Aktyor Alixan (Nurmuhammad Xusniddinov) Salom live YouTube kanaliga bergan intervyusida Amerikadagi 10 yillik hayoti davomida nima ishlar qilgani, Green Card’i bo‘lsa ham u yerga yashash uchun ketmayotganiga nima sabab bo‘lgani haqida gapirdi.
“Qilmagan ishim qolmagan, to‘g‘risi. Bir xil odamlarga o‘xshab villada yashayapman yoki mana bu mening villam deb, Mercedes’ning oldida rasmga tushib, pafos yasagim kelmaydi. To‘g‘risini aytsam, pol artishdan tortib idish yuvishgacha, qilmagan ishim qolmagan. Birinchidan, u yerda talabaman. Ertalabdan kechgacha ishlashga haqimiz yo‘q, huquqimiz ham. Bu degani har qanday ish sizni quchoq ochib kutib olmaydi. Ham tilni bilmayman. Til o‘rganishga endi qadam bosganman. Qisqa qilib aytadigan bo‘lsam, restoran yoki McDonald’s kabi fastfudlarda idish-tovoq yuvishdan boshlab, sekin-sekin gamburger tayyorlashga, undan keyin yetkazib berish xizmatiga o‘tib, shu tarzda noldan boshlaganman. Amerikaga bordingiz, til bilmaysiz va pul yo‘q. Shundan boshlab, 10 yil ichida ancha ishlarda ishlab chiqdim. Green Card ham berishdi. To‘g‘risini aytsam, qilmagan ishim qolmadi. Toshkentga kelganimdan keyin uylanib, ota-ona, oila va farzandlar oldida qoldim”, – deydi aktyor.
“Amerikani sog‘inib turasizmi hozir?”, – degan savolga aktyor quyidagicha javob beradi:
“Pitssa yeyishni sog‘inaman. Chunki hali O‘zbekistonda, Toshkentda, biror joyda hali Amerikada yegan pitssani ta’tib ko‘rmadim. Pitssachilar bo‘lsa, meni ko‘rishsin, chaqirishsin, taklif qilishsin. Vaholanki, 80 foiz brendning nomi “amerikacha”. Bolalarimni har dam olish kuni aylantirishga olib chiqaman. Baribir bu pitssa yeyish bilan tugallanadi. Har xil pitssalardan yeb chiqdim, hali biror marta Amerika pitssasining ta’mi, mazasini ko‘rganim yo‘q. U yerga qaytib, ishlashni, yashashni sog‘inganim yo‘q. Bilmadim, o‘zimni qaysidir darajada “patriot” deb bilamanmi? Ko‘plar aytadi, Green Card’ing bor, aktyorsan, ingliz tilini bilasan, nima qilib yuribsan, deganlar juda ko‘p-da. Lekin men O‘zbekistonimda, oilam, onam, bola-chaqam oldida bo‘lsam, u yerda uch so‘m topgandan ko‘ra, bu yerdagi bir so‘mda barakali bo‘ladi”.
Alixan, shuningdek, Gollivud filmlarining ommaviy sahnalaridagi ishtiroki uchun unga qancha gonorar to‘lashgani haqida ham gapirdi.
“Amerika bilan bu yerda, misol uchun, kunlik to‘lov, albatta, har xil. Ommaviy sahnada ishtirok etganimizda, 8 dollardan yozilar edi. O‘ynasa, o‘ynamasa, bir chetda o‘tirsa ham soatiga 8 dollardan boshlanar edi. Kamida 8 soat bo‘ladi. Keyinchalik epizod rollarda o‘ynaganimda, 10 yil avval desak, o‘sha vaqtda bir kunlik daromadim 750 dollar bo‘lardi”, – deydi aktyor.
Izoh (0)