“Buxoroda 2026-yilga qadar sayyohlar soni besh milliondan oshadi” — Botir Zaripov

Xalq deputatlari Buxoro viloyati kengashining 44-sessiyasida viloyat hokimi Botir Zaripov 2022–2026-yillarda viloyatning turizm sohasidagi rejalari to‘g‘risida to‘xtalar ekan, viloyatda sayyohlar sonining 5 milliondan oshishi kutilayotganini ma’lum qildi. Bu haqda “Daryo” muxbiri xabar bermoqda.

“Bugun tarixiy shahrimizga tashrif buyurayotgan xorijiy va mahalliy sayyohlar sonining oshayotganini kuzatib, 2026-yilga qadar ular soni besh milliondan oshadi, deya olaman. Sayyohlarning viloyatda bo‘lish muddatlarini uzaytirish maqsadida 60 ta yangi turistik yo‘nalishlar tashkil qilinadi. Shuningdek, viloyatning turizm salohiyati yuqori bo‘lgan tumanlar, jumladan, Kogon, Romitan, G‘ijduvon, Vobkent va boshqa tumanlarida 7 ta ‘turizm mahallasi’, ‘turizm qishlog‘i’ hamda ‘turizm ko‘chasi’ tashkil etiladi”, – dedi Botir Zaripov.

Ta’kidlanishicha, viloyatda sayyohlar oqimini yanada ko‘paytirish maqsadida 27 ta xorijiy aviaqatnovlar ham tashkil etiladi.

“O‘ttizga yaqin aviaqatnovlarning 24 tasi xorijiy yo‘nalishda tashkil etilsa, 3 tasi Buxoro–Farg‘ona, Buxoro–Samarqand hamda Buxoro–Termiz yo‘nalishlarida tashkil etiladi”, – deydi viloyat hokimi.

Botir Zaripovning so‘ziga ko‘ra, ayni paytda Buxorodagi 7 ta tarixiy obyekt umumjahon madaniy merosi ro‘yxatiga kiritilgan. Mavjud 800 dan ortiq tarixiy obidalarning 50 ga yaqini restavratsiyaga muhtoj. U ushbu madaniy obyektlar bosqichma-bosqich restavratsiya qilinishini ta’kidladi.