So‘nggi marta qachon teatrga bordingiz? Bu savolga darhol javob beradiganlar juda ozchilikni tashkil etishi aniq. Chunki tomoshabinlar avvalgidek teatrlarga serqatnov emas, o‘z xohishi bilan spektaklga keladiganlar esa barmoq bilan sanarli. Xo‘sh, poytaxt teatrlaridagi eng tomoshabop spektakllar va ularning chipta narxi qancha?

Botir Muhammadjonov — O‘zbek milliy akademik drama teatri truppa rahbari:

— Ayni kunlarda teatrimizdagi eng tomoshabop spektakllar: “Andishali kelinchak”, “Ko‘ngil”, “Keldi-yu, ketdi”, “Urush odamlari” va “O‘zgalar dardi” hisoblanadi. Dam olish kunlari mazkur spektakllarga chipta topish muammo. O‘zbekiston xalq artisti Dilbar Ikromovaning vafotidan so‘ng “O‘zbekcha raqs” spektaklining namoyishi vaqtincha to‘xtatilgandi. Dekabr oyidan boshlab spektakl yana sahnaga qaytdi. Endilikda asosiy rolni Malika Ibrohimova va Mahfuza Bobotillayevalar ijro etishyapti.

Keyingi paytlarda komediya janridagi asarlarga talab yuqori. Dam olish kunlari namoyish etiladigan “Andishali kelinchak” va “Ko‘ngil” spektakllariga bir necha hafta oldin chiptalar sotuvi tugatiladi.

Foto: “Milliyteatr.uz”

“Andishali kelinchak” spektaklining ilk premyerasi 2005-yilning 15-iyun sanasida o‘tkazilgan. Shu kungacha necha marta namoyish etilganligi haqidagi aniq ma’lumot yo‘q. Erkin Xushvaqtov asari asosida sahnalashtirilgan spektaklda bosh rollarni: Dilnoza Kubayeva, Shodiya To‘xtayeva, Rixsitilla Abdullayev, Avaz Qodirov, Saida Rametova, Shohida Ismoilova va Xosiyat Husanova kabi el ardog‘idagi aktyorlar jamoasi ijro etishadi.

Foto: “Milliyteatr.uz”

Spektakl haqida qisqacha: Asar Olmaxon ismli yosh kelinchakning o‘zga xonadonga moslashib ketishi haqida hikoya qiladi. Kelinchakni qaynonasi xushlamaydi, shu bois oilada ziddiyatli vaziyatlarga uchraydi. Hatto qaynona kelinini tug‘maslikda ayblab, o‘g‘lini boshqa qizga uylantirmoqchi bo‘ladi. Ikki yosh esa baxt uchun kurashib, onaning ko‘ngliga yo‘l topishadi.

Foto: “Milliyteatr.uz”

“Ko‘ngil” spektaklining premyerasi 2015-yilning 8-aprel sanasida o‘tkazilgan. Asar muallifi Erkin Xushvaqtov “Ko‘ngil”ni O‘zbekiston xalq artisti Muqaddas Xoliqovaning taklifiga ko‘ra yozgan. Dramaturg asarni yozishda shoira Marhabo Karimovaning she’ridan ilhomlanganini ham yashirmaydi. Bosh rollarni Muqaddas Xoliqova, Farhod Abdullayev, Shahlo Temirova, Baxtiyor Yusupovlar ijro etishgan.

Foto: “Milliyteatr.uz”

Spektakl haqida qisqacha: Ayolga turmush o‘rtog‘i guldasta olib keladi. Bundan quvongan ayolning dunyoga bo‘lgan qarashlari o‘zgaradi. Tashqi ko‘rinishiga e’tibor berishi lozimligini anglab yetadi. U avvalgidan go‘zallashadi. Turmush o‘rtog‘iga bo‘lgan munosabatlari ham o‘zgaradi. Ammo erkak ayolni quvontirgan gulni xarid qilmagani va uni yo‘lakdan topib olganini aytadi. Spektakl so‘ngida erkak oilaviy munosabatlarning yaxshilanishida e’tiborning naqadar katta kuchga egaligini tushunib yetadi.

Chiptalar 30 000 – 50 000 so‘mgacha bo‘lgan narxda sotiladi.

Xayrulla Inog‘omov — Muqimiy nomidagi O‘zbekiston davlat musiqali teatrining tomoshabinlar bilan ishlash bo‘yicha direktor o‘rinbosari:

Foto: “Muqimiyteatr.uz”

— Shu kungacha teatrimizdagi eng anshlag spektakl “Super qaynona” bo‘lgan. U 20 yilga yaqin namoyish etilib, ikki yil avval repertuardan olib tashlandi. Hozirgi kunda “Antiqa sovchilar”, “Aqldan ozish hech gapmas”, “Asl xazina” va “Oliftalar” spektakliga talab birmuncha yuqori.

Spektakllarimizga bilet topish muammo emas. Dam olish kunlari 400 kishilik tomosha zali muxlislar bilan to‘ladi, qolgan kunlari esa 100-200 kishi tashrif buyuradi. Ixtiyoriy tashrif buyuruvchilar kamligi uchun korxona va tashkilotlar bilan hamkorlikda ishlashimizga to‘g‘ri keladi.

Foto: “Muqimiyteatr.uz”

“Antiqa sovchilar” spektakli Isfandiyor qalamiga mansub bo‘lib, bosh rollarni Mehri Bekjonova, Gulchehra Nosirova, Turg‘un Beknazarov, Xayrulla Inogomov, Malika Qayumova, Maxsuda Otajonova kabi aktyorlar jamoasi ijro etishadi.

Spektakl haqida qisqacha: Izzat aka qizi Nargizaga kelgan sovchilardan birini tanlolmay boshi qotadi. U qiziga oshiq bo‘lgan Baxtiyorga qizini turmushga berishni istamaydi.  Bir kuni Izzat akaning tushiga rahmatli otasi kirib, nabirasini Baxtiyorga turmushga bersa, baxtli bo‘lishi haqida aytadi. Shu kundan boshlab ota Baxtiyorning hayotiga qiziqadi. U yashirincha bo‘lsa-da, yigitga Nargizaga uylanishni taklif qiladi. Spektakl ikki yoshning baxt oqshomi bilan yakunlanadi.

Chiptalar 10 000 – 40 000 so‘mgacha bo‘lgan narxda sotiladi.

Uchqun O‘sarov — O‘zbekiston davlat drama teatri adabiy emakdoshi:

Foto: “Uzddt.uz”

— Ayni kunlarda teatrimiz asosan yosh tomoshabinlar uchun “Yangi yil ertagi” spektaklini namoyish etmoqda. Tan olish kerak, spektakl tomoshalariga tashrif buyuruvchilar nihoyatda kam. Shu bois maktab, institut va korxonalar bilan hamkorlikda ishlashimizga to‘g‘ri keladi. “Ayajonlarim”, “Ming yillik hangoma”. “Qaytar dunyo” va “Vafodor” singari spektakllarimiz tomoshabinlar e’tiboridan chetda qolayotgani ko‘ngilni xira qiladi.

Foto: “Uzddt.uz”

“Yillar armoni” — O‘zbekiston Qahramoni Abdulla Oripovning 80 yilligi munosabati bilan dramaturg Uchqun O‘sarov qalamiga mansub, rejissor Rasuljon Tog‘ayqulov tomonidan sahnalashtirilgan. Unda bosh rollarni Po‘lat Normatov, Shukurjon So‘fiyev, Madina To‘xtayeva, Mahbuba Xurramova kabi aktyorlar ijro etishgan. Asarda Abdulla Oripovning hayot va ijodi bilan bog‘liq voqealar ko‘rsatiladi. Bundan tashqari, shoirning mashhur she’rlari yozilishiga turtki bo‘lgan voqealar ham spektakl sujetiga kiritilgan.

Chiptalar 10 000 – 40 000 so‘mgacha bo‘lgan narxda sotiladi. Kelishuvga ko‘ra maktab o‘quvchilari va talabalar uchun maxsus chegirmalar mavjud.

Qahramon Meliyev — O‘zbek davlat satira teatri direktori o‘rinbosari:

Foto: “Satirateatri.uz”

— Teatr binosi chekka hududda joylashgani uchun tomoshabinlarning kelishi havas qilgudek emas. Ko‘p hollarda 300 o‘rinli tomosha zaliga 50-100 ta tomoshabinlar kelishadi. Barmoq bilan sanarli tomoshabinlar uchun spektakl qo‘ygan paytlarimiz ham ko‘p bo‘lgan. Ayni kunlarda teatrimizda “Julqunboy”, “Uylanish”, “Doktor falsafasi” kabi spektakllar namoyish etilmoqda. Bolajonlar uchun “Qor malikasi” spektakli sahnalashtirilgan. Bu spektaklga maktab va korxonalar bilan hamkorlikda chiptalar sotilmoqda.

Foto: “Satirateatri.uz”

“Julqunboy” — yozuvchi Abdulla Qodiriyning kichik hikoyalari asosida sahnalashtirilgan. Unda jamiyatdagi adolatsizlik, poraxo‘rlik va mansabparastlik kabi illatlar achchiq kulgi ostiga olinadi.

Chiptalar 10 000 – 20 000 so‘mgacha bo‘lgan narxda sotiladi.

Bobur Yo‘ldoshev — “Diydor” teatr-studiyasi rahbari:

Foto: Instagram / @diydor_teatr_studiyasi

— Ayni kunlarda teatrimizda “Yulduzli tunlar”, Arshin mal alan”, “Mungli ko‘z”, “Kapalak tushi” kabi spektakllar namoyish etilmoqda. Spektakllar faqat shanba va yakshanba kunlari namoyish etiladi. Teatr binosi kichik bo‘lgani uchun tomosha zalimizga 100 ta odam sig‘ishi mumkin, ammo har doim ham bu natijaga erishmaymiz. Odatda, 60-70 ta tomoshabin tashrif buyuradi.

Foto: Instagram / @diydor_teatr_studiyasi

“Diydor” teatr-studiyasida chiptalar bepul.

Eng qimmat chipta bilan balet spektaklini tomosha qilasiz

Foto: “Gabt.uz”

Alisher Navoiy nomidagi O‘zbekiston davlat akademik katta teatri tomoshabop spektakllarni sahnalashtirishda faol.

Shu kunlarda “Bogema” operasi 33-55 ming so‘mgacha, “Oqqush ko‘li” va “Qarsildoq” balet spektakllariga esa 33-110 ming so‘mgacha bo‘lgan narxda chiptalar sotilmoqda. Teatr bir oy davomida taxminan 5-6 balet spektaklini, 3-4 ta opera spektaklini namoyish etadi. Balet spektakllarining chiptalari bir hafta avval xarid qilinishi ko‘pchilik o‘zbek tomoshabinlari uchun taajjublanarli hol.

Bolalar teatrlarida nima gap?

Foto: Facebook

1. O‘zbek milliy qo‘g‘irchoq teatri — 25-dekabrdan boshlab “Qor malikasi” spektakli namoyish etiladi. Seanslardan oldin qorbobo va qorqiz ishtirokidagi bayram tomoshalari ham o‘tkaziladi.

Chiptalar narxi 25 000 so‘m.

2. O‘zbekiston davlat yosh tomoshabinlar teatri — 25-dekabrdan boshlab “Uchar kema” nomli sarguzasht spektaklni namoyish etadi. Spektakl namoyishidan avval Yangi yil konsert dasturi ham o‘tkaziladi.

Chiptalar narxi 25 000 so‘m.

Muallif:Nargizaxon Murodova