O‘zbekistonda talabalarning to‘lov-kontrakt summasini to‘lash muddati 2021-yilning 31-dekabriga qadar uzaytirildi, deb xabar bermoqda Oliy va o‘rta maxsus ta’lim vazirligi.
Ma’lum qilinishicha, Vazirlar Mahkamasi huzuridagi Ta’lim muassasalariga o‘qishga qabul qilish bo‘yicha Davlat komissiyasining 15-dekabrdagi qaroriga muvofiq, 2021/2022-o‘quv yilida oliy ta’lim muassasalari bakalavriati va magistraturasiga to‘lov-kontrakt, shu jumladan, tabaqalashtirilgan to‘lov-kontrakt asosida talabalikka tavsiya etilgan abituriyentlar, o‘qishi ko‘chirilgan (ko‘chirib tiklangan) va qayta tiklangan talabalar o‘qishi uchun to‘lov haqini o‘tkazish hamda talabalar safiga qabul qilishni rasmiylashtirishning so‘nggi muddati 2021-yilning 31-dekabri etib belgilangan.
Shuningdek, koronavirus infeksiyasiga qarshi 15-noyabrga qadar to‘liq emlangan (vaksina olgan), lekin emlanganlik to‘g‘risidagi sertifikatni belgilangan muddatdan kechikib oliy ta’lim muassasasiga taqdim etgan abituriyentlar va talabalarga to‘lov-kontrakt summasini to‘lashda bir martalik 10 foizli chegirmani qo‘llashga ruxsat berilgan.
Eslatib o‘tamiz, Oliy va o‘rta maxsus ta’lim vazirligi O‘zbekiston OTMlariga qabul qilingan talabalarning yangi 2021/2022-o‘quv yili uchun to‘lov-kontrakt miqdorlarini e’lon qilgandi. Keyinroq vazirlik OTMlarda kontrakt miqdori oshgani yuzasidan munosabat bildirib, Prezidentining farmon va hukumat qarorlari bilan ish haqi miqdorlari oshirilganda to‘lov-kontrakt narxlari ham oshirilib borilishini ma’lum qilgan.
Bundan tashqari, 2021-yilning aprel oyida O‘zbekistonda COVID-19 ga qarshi vaksina olgan talabalarga kontrakt to‘lashda chegirma berilishi, keyinchalik vaksina olgan talabalarga chegirma berish muddati 15-noyabrgacha uzaytirilishi xabar qilingandi.
Izoh (0)