“Tolibon” harakati vakillari 2021-yil 15-avgustda sobiq prezident hamid Karzayning taklifiga ko‘ra Afg‘oniston poytaxti Kobulni egallagan. Karzay bu haqida AP nashriga intervyu berdi.
Hamid Karzay 2001–2014-yillarda Afg‘oniston hukumatini boshqargan, u 2004-yilgacha prezident vazifasini bajaruvchi, qolgan yillarda esa mamlakatning saylangan prezidenti maqomida faoliyat olib borgan. Toliblar hokimiyat tepasiga kelguniga qadar ikki yil davomida “Tolibon” bilan Afg‘onistonda jangovar harakatlarni to‘xtatib, urushga barham berish borasida maxsus delegatsiya tarkibida muzokaralar o‘tkazgan. Avgust o‘rtalarida toliblar Kobulga kirgan vaqtda ham Karzay poytaxt hududida bo‘lgan.
AP’ga bergan intervyusida u o‘sha vaqtda amaldagi prezident hisoblangan Ashraf G‘anining mamlakatdan chiqib ketganini eshitgach, o‘zi aholini himoya qilish maqsadida “Tolibon”ni Kobulga chaqirgani haqida so‘zlab berdi.
“O‘sha vaqtda poytaxtda hech kim qolmagandi: rasmiy hukumat vakillari ham, politsiya boshliqlari ham, harbiy qismlar komandirlari ham. “Tolibon”dan shaharga kelish, aholini himoya qilish, mamlakatni va uning hududlarini inqirozdan olib chiqishga chorladim, aks holda boshqa jangari guruhlar mamlakatni, do‘konlarni o‘marishi mumkin edi. Ya’ni bu chorasiz qolgan pallada topilgan avtomatik yechim”, — degan Afg‘oniston sobiq prezidenti.
Eslatib o‘tamiz, “Tolibon” Kobulni 15-avgustdan 16-avgustga o‘tar kechasi o‘z nazorati ostiga olgandi.
Avvalroq AQSh Mudofaa vazirligi matbuot kotibi Jon Kirbi “Amerika ovozi”ga Pentagon uchun Kobulning bu darajada tez qulashi, Afg‘oniston xavfsizlik kuchlari hamda Ashraf G‘anining qochib ketishi kutilmagan hodisa bo‘lganligini ma’lum qilgandi.
Ayni vaqtda Ashraf G‘ani oila a’zolari bilan Birlashgan Arab Amirliklarida bo‘lib turibdi. U hanuzgacha rasman prezidentlik lavozimidan iste’fo berganligini e’lon qilmagan. Ammo Afg‘oniston vitse-prezidenti Amrulloh Solih o‘zini prezident vazifasini vaqtincha bajaruvchi deb e’lon qilgan, u ham mamlakat hududidan tashqarida.
Karzay hali ham Kobul hududida yashaydi. U va Tinchlik o‘rnatish bo‘yicha oliy kengashning sobiq rahbari Abdulla Abdullaning uy qamog‘ida saqlanayotgani haqida ham xabarlar tarqalgan.
Karzay hamda Abdulla bu boradagi xabarlarga munosabat bildirishmagan. “Tolibon” rasmiylari esa mazkur axborotlarni inkor etgan. Karzay ham tez-tez jurnalistlar hamda xorij diplomatlari bilan uchrashib turibdi.
Izoh (0)