Qoraqalpog‘istonda “Qizil kitob”ga kiritilgan 14 ta kiyik va 5 ta yovvoyi quyonni otib o‘ldirgan brakonyerlarga jinoyat ishi qo‘zg‘atildi

Qoraqalpog‘istonda brakonyerlar “Qizil kitob”ga kiritilgan 14 ta kiyik va 5 ta yovvoyi quyonni otib o‘ldirgani haqida xabar berilgan edi. Bosh prokuratura axborot xizmati rahbari Hayot Shamsutdinov holat yuzasidan jinoyat ishi qo‘zg‘atilganini ma’lum qildi.

Qayd etilishicha, holat yuzasidan Orol tabiatni muhofaza qilish prokuraturasi tomonidan tergovga qadar tekshirishda O‘zbekiston hayvonot dunyosiga 190 million 350 ming so‘mlik moddiy zarar yetkazilgani aniqlangan.

Mazkur holat yuzasidan to‘rt nafar shaxsga nisbatan Jinoyat kodeksining 202-moddasi (hayvonot yoki o‘simlik dunyosidan foydalanish tartibini buzish) 3-qismi “y” va “j” bandlari bilan jinoyat ishi qo‘zg‘atilgan.

Eslatib o‘tamiz, holat 12-dekabr kuni Ekologiya sohasidagi nazorat inspeksiyasining Qoraqalpog‘iston Respublikasi Taxtako‘pir tumanida xizmat olib borayotgan xodimlar tomonidan aniqlangan.

Noqonuniy ovchilar ekologiya nazorat inspeksiyasi xodimlari kelayotganini ko‘rib, otilgan hayvonlar, kiyim-kechak, oziq-ovqat, yoqilg‘i, o‘q-aslahalarini tashlab, noma’lum yo‘nalishda davlat raqamisiz UAZ avtomobilida qochib ketgan. Inspektorlar taxminan 5 kilometr masofagacha ularning izidan borgan, ammo ushlash imkoni bo‘lmagan.

Voqea joyi ko‘zdan kechirilganda otilgan patron gilzasi, idish-tovoq, xo‘jalik buyumlari bo‘lgan pichoq, bolta, yoqilg‘i, kiyim-boshlar hamda “Qizil kitob”ga kiritilgan 14 dona jayron, 5 dona yovvoyi quyon tashlab ketilgani ma’lum bo‘lgan. Ular qoldirgan ashyolar ichidan M.M. nomiga xorijdan T.M. ismli shaxsdan 12-oktabr kuni chet el valyutasida pul o‘tkazganini tasdiqlovchi kvitansiya ham topilgan.

Davlat inspektorlari tomonidan ushbu holat yuzasidan tegishli tartibda dalolatnoma tuzilib, voqea joyi videotasvirga olingan.

Ayni paytda holat yuzasidan tergov harakatlari olib borilmoqda.