O‘zbekiston prezidentining tegishli qaroriga muvofiq Dilshod Xojiahmedov suv xo‘jaligi vazirining o‘rinbosari — Suv xo‘jaligida kapital qurilish loyihalarini amalga oshirish agentligi bosh direktori lavozimiga tayinlandi, deb xabar beradi O‘zA.
Tayinlovga qadar Dilshod Xojiahmedov Farg‘ona viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimida 2017-yildan beri ishlab kelayotgan edi.
Unga Suv xo‘jaligi vazirligi markaziy apparatining Yerlarning meliorativ holatini yaxshilash boshqarmasi, Suv xo‘jaligini mexanizatsiyalashtirish bo‘limi, shuningdek, agentlik faoliyatini muvofiqlashtirish, nazorat qilish va bevosita boshqarish vazifalari yuklatilgan.
Suv xo‘jaligida kapital qurilish loyihalarini amalga oshirish yuzasidan tizimli monitoring yuritish, buyurtmachi va pudrat tashkilotlari tomonidan shaharsozlik normalari va qoidalari talablariga rioya etilishini ta’minlash, loyihalarni amalga oshirish jarayonida yuzaga kelgan muammolarni bartaraf etish choralarini ko‘rish kabi vazifalarga ham mas’ul hisoblanadi.
Ma’lumot uchun, Dilshod Xojiahmedov 1975-yilda Farg‘ona viloyatida tug‘ilgan. Farg‘ona politexnika institutini tamomlagan, mutaxassisligi muhandis-quruvchi. Mehnat faoliyatini 1993-yilda Rishton qurilish boshqarmasi 2-toifali betonchisi lavozimida boshlab, 1995−2001-yillarda “Farg‘onasuvqurilish” boshqarmasiga qarashli 1-sonli qurilish montaj korxonasida turli lavozimlarda faoliyat yuritgan. 2001−2017-yillarda Farg‘ona viloyatidagi qurilish tashkilotlarida turli rahbarlik lavozimlarida ishlagan.
Eslatib o‘tamiz, 2020-yilning 10-iyulida prezidentning “O‘zbekiston Respublikasi suv xo‘jaligini rivojlantirishning 2020—2030-yillarga mo‘ljallangan konsepsiyasini tasdiqlash to‘g‘risida”gi farmoni imzolangan edi.
Izoh (0)