Hindiston bosh vaziri Narendra Modining Twitter akkaunti xakerlar hujumiga uchradi. Bu haqda uning idorasi ijtimoiy tarmoqda xabar berdi, deb yozadi “RBK”.
Idora ma’lumotlariga ko‘ra, xakerlar akkauntni “juda qisqa vaqt davomida” nazorat qilgan. “Twitter ogohlantirildi va akkaunt darhol himoyaga olindi”, — deyiladi xabarda.
Bosh vazir idorasining xabarida, shuningdek, akkaunt buzilgan vaqt davomida “nashr etilgan tvitlarning hech biriga e’tibor bermaslik kerak”ligi aytilgan, biroq voqea aynan qachon sodir bo‘lgani va qachon akkaunt qaytarib olinganiga aniqlik kiritilmagan.
Twitter hujum haqida ma’lumot olishi bilanoq akkaunt ustidan nazoratni tiklash uchun barcha zarur choralar ko‘rilganini ma’lum qildi, deb xabar bermoqda Reuters. Tekshiruvlarda boshqa akkauntlar ham buzilgani haqida hech qanday belgi aniqlanmagan.
Bloomberg’ning yozishicha, Modining akkaunti buzilgan vaqtda Hindiston rasmiy ravishda bitkoinga qonuniy to‘lov vositasi maqomini bergani haqida tvit e’lon qilingan. Shuningdek, mamlakat kriptovalyutani sotib olgani, uni fuqarolarga tarqatishi haqida aytilgan.
Modining Twitter akkaunti bundan bir yil oldin, 2020-yil sentabr oyida ham xakerlar hujumiga uchragandi. O‘shanda akkauntda uni Jon Uik filmida shu nomdagi qahramonni o‘ynagan Kianu Rivz buzgani haqida yozuv paydo bo‘lgan. Shundan so‘ng xakerlar Narendra Modining akkaunti orqali bosh vazir tomonidan COVID-19 bilan kurashish uchun tashkil etilgan fondga kriptovalyuta xayriya qilishga chaqiruvchi bir nechta tvitlar e’lon qilgan.
Avvalroq xakerlar AQSh Federal qidiruv byurosining (FQB) tashqi elektron pochta tizimini buzib kirib, kamida 100 ming kishiga elektron xat jo‘natgani xabar qilingandi. FQBning ma’lum qilishicha, hujumchilar chindan ham FQB manzillaridan soxta elektron pochta xabarlarini yuborgan, biroq ular byuro ma’lumotlariga kirishga yoki ularni buzishga muvaffaq bo‘lmagan.