Pishloq, sharbat hamda muzlatkichda bir necha kun qolib ketgach, iste’mol qilib bo‘lmaydigan boshqa mahsulotlar

Qaysi mahsulotlarni yaroqlilik muddati o‘tganidan keyin tashlab yuborish kerakligi haqida “Domashniy ochag” jurnali ma’lumot beradi.

Go‘sht

Bo‘laklarga bo‘lingan yoki sovitkichda butunligicha turgan go‘shtni xarid qilinganidan keyin besh kundan ortiq saqlab bo‘lmaydi. Qolaversa, do‘kondan olingan bo‘lsa, yaroqlilik muddati bilan tanishish va unga amal qilish tavsiya qilinadi.

Tovuq go‘shti

Muzlatilgan tovuq go‘shtini xarid qilgandan keyin, uni o‘sha kuniyoq ishlatib yuborish kerak. Buning iloji bo‘lmaganda esa Selsiy shkalasi bo‘yicha +4 darajadan yuqori bo‘lmagan haroratda saqlash lozim.

Qiyma

Go‘sht va tovuq filesidan tayyorlanib, sovitkichda turgan qiymani 12 soat ichida ishlatgan ma’qul. Yo‘qsa, uni muzlatkichda saqlash kerak.

Tuxum

Tuxum xarid qilganda ishlab chiqarilgan sanasiga nazar tashlang. Shundan keyin 3-4 hafta saqlasangiz bo‘ladi. Ushbu mahsulotni sovitkichda saqlash, yaroqlilik muddati o‘tganidan keyin esa tashlab yuborish lozim.

Yumshoq pishloq

Sovitkichda uzoq vaqt qolib ketgan qattiq pishloqning chetlarini kesib tashlab, o‘zini ishlatsa bo‘ladi. Suyuq pishloq ustini mog‘or qoplashni boshlaganda esa bunday qilish yaramaydi. Ko‘rinishi yoki hidi o‘zgarsa, sovitkichda 15 kundan ko‘proq vaqtdan buyon bilan turgan bo‘lsa, yaxshisi tashlab yuborgan ma’qul.

Ko‘katlar

Salomatlik uchun foydali bo‘lgan ko‘katlar sarg‘ayish va nam bo‘lishni boshlasa, o‘ylab ham o‘tirmay tashlab yuboring.

Sabzavotli sharbatlar

Ko‘pchilik shakar va ozuqaviy moddalar bisyor ekani sabab mevali sharbat o‘rniga sabzavotlisini ichish kerak deb o‘ylaydi. Amma aynan shakar va kislota miqdorining kamligi hisobiga mazkur sharbatlar tez ayniydi. Shu sabab ham yaroqlilik muddati o‘tganidan keyin tashlab yuborish va ochgandan keyin o‘sha kunning o‘zida ishlatish tavsiya qilinadi.

Mayda qisqichbaqa (krevetka)

Dengiz mahsulotlaridan zaharlanish juda ham og‘ir kechadi, mayda qisqichbaqalar esa boshqa mollyuskalar singari tez aynib qoladi. Yangiligida ularni sovitkichda 3 kungacha, muzlatilgan variantda esa ikki oygacha saqlash mumkin.