“Qo‘l panjalari bilagidan uzilib tushgan 36 yoshli ayol hayoti saqlab qolindi”. Vazir o‘rinbosari Denovdagi portlashdan jabrlanganlar haqida ma’lumot berdi

Surxondaryo viloyatining Denov shahridagi savdo markazida kelib chiqqan portlash oqibatida “Indenim”da ishlovchi 36 yoshli ayolning panjalari bilagidan uzilib tushib, ko‘p qon yo‘qotgan va hayoti xavf ostida qolgan. Shifokorlar yordami bilan ayolning hayoti saqlab qolingan. Bu haqda Denov shahrida bo‘lib o‘tgan mas’ullar ishtirokidagi matbuot brifingida sog‘liqni saqlash vazirining birinchi o‘rinbosari Amrullo Inoyatov ma’lum qildi, deya xabar berdi “Daryo” muxbiri.

Vazir o‘rinbosarining ma’lumot berishicha, portlash oqibatida 11 nafar fuqaro — “Indenim” savdo majmuasida ishlovchi 7 nafar, savdo markazi qoshidagi somsaxonaning bir nafar, tuman hokimligining bir nafar hamda qo‘shni binolardagi ikki nafar ishchi jarohat olgan.

“Binodagi portlash 03:57 da sodir bo‘lgan bo‘lsa, tez yordam xodimlari voqea joyiga 4 daqiqada yetib borib, savdo markazi ichida jabrlanganlarning besh nafarini zudlik bilan shifoxonaga olib kelgan (ikki nafar fuqaro voqea joyida vafot etgandi). Besh nafar fuqarodan ikki nafarining ahvoli og‘ir bo‘lib, ulardan biri Feruza Omonovaning qo‘l panjalari bilagidan uzilib tushgan. Ya’ni travmatik uzilish sodir bo‘lgan. Shuningdek, bemorda bosh miyadan yopiq jarohat olish, tos suyagi sinishi, badanida esa turli ezilgan va shilingan jarohatlar borligi ma’lum bo‘lgan. Bemorda ochiq va yopiq qon ketishi, ya’ni o‘tkir qon ketishi kuzatilgan. Shunga qaramay mutaxassislarimiz bemorga yordam berib uning hayotini saqlab qoldi”, — deydi vazir o‘rinbosari.

Amrullo Inoyatovning qo‘shimcha qilishicha, portlash sodir bo‘lganidan so‘ng bosh vazir topshirig‘iga ko‘ra, poytaxtdan ko‘plab mutaxassislar, jumladan, respublika shoshilinch ixtisoslashgan tibbiyot markazi rahbari boshchiligidagi malakali mutaxassislar Denovga yetib kelib, bemorlarga yordam ko‘rsatgan.

“Muhimi bemor ayol hayotini saqlab qoldik. Kecha ayol o‘ta og‘ir ahvolda edi. Bugun ahvoli juda yaxshi. Yaqinlari bilan suhbatlashyapti”, — dedi Amrullo Inoyatov.

Sog‘liqni saqlash vazirining birinchi o‘rinbosari yana bir bemorning ahvoli og‘ir bo‘lganini, unga ham o‘z vaqtida ko‘rsatilgan yordam sabab hayoti saqlab qolinganini aytgan. Biroq bemor haqida boshqa ma’lumot bermagan. Mas’ulning qo‘shimcha qilishicha, qolgan bemorlar bugun shifoxonaning jonlantirish bo‘limidan rejali bo‘limlarga o‘tkazilgan.

Eslatib o‘tamiz, “Daryo” muxbiri bilan suhbatlashgan Islom Ostonaqulov turmush o‘rtog‘i Feruza Omonovaning portlash sodir bo‘lgandan keyingi ahvolini gapirib bergandi. Xotini haqida gapirgan bemor portlashdan so‘ng ayolining baqirib, odamlarni yordamga chaqirganini eslab, “Menga yordam bergan Sobir aka bilan birga baqirib, yordamga chaqirayotgan xotinimning oldiga bordik. Uni beton bosgan, kallasi yirtilib yotibdi, sochlarini beton bo‘laklari qisib qolgan ekan, juda qiyin ahvolda edi”, – degandi.