Britaniyalik rassom Eydan Liban dunyodagi eng qimmat Rojdestvo sviterini to‘qish uchun 1 yilga yaqin vaqt sarfladi. Rassom o‘z ijod mahsulini 30 ming funt sterling (39 714 dollar)ga sotish va mablag‘ning bir qismini Buyuk Britaniyadagi sog‘liqni saqlash milliy xizmatiga xayriya qilish niyatida. Bu haqda Esquire xabar beradi.
Ma’lum bo‘lishicha, 2020-yil dekabrdan sviter to‘qishga kirishgan Liban 2021-yil noyabrda ishga yakun yasagan. Buning uchun u bor mablag‘i — 7000 funtning barini sarflagan. Sviterdagi bug‘u uchun 2 ming dona Swarovski kristallari, kumush rang yulduzlar uchun esa 150 ming dona brilliant ishlatilgan. Sviter uchun yuqori sifatli tilla ip, paxta va italyan ipagidan foydalanilgan. Libanning ta’kidlashicha, sviter nafis va uni yuvish mumkin emas.
“Men muhtasham, e’tibor jalb qiladigan nimadir yaratishni istadim va buning uddasidan chiqdim. Jarayonda juda ham ko‘p ishlashimga to‘g‘ri keldi”, — degan u.
Avvalgi eng qimmat jemper 2016-yilda bayram liboslarini tikishga ixtisoslashgan Tipsy Elves kompaniyasi tomonidan taqdim qilingan. 24 ming dona kristall bilan bezatilgan sviter 24 ming dollarga sotilgan.
Izoh (0)