Yaponiya bosh vaziri Fumio Kisida KXDR yetakchisi Kim Chen In bilan muzokaralar o‘tkazishga tayyor. Bu haqda siyosatchi Yaponiya parlamentining 207-sessiyasi ochilishidagi nutqida aytib o‘tdi.
Sessiya davomida Kisida o‘n yillar oldin Shimoliy Koreya agentlari tomonidan o‘g‘irlab ketilgan Yaponiya fuqarolari masalasini hal etish zarurligini ta’kidladi. U Shimoliy Koreya yetakchisi Kim Chen In bilan muammoni hal qilish uchun hech qanday shartlarsiz uchrashishga tayyor ekanini yana bir bor ta’kidladi.
“Hech qanday shartlarsiz shaxsan o‘zim Kim Chen In bilan bevosita muloqotga kirishishga tayyorman. Yaponiya va Shimoliy Koreya o‘rtasidagi munosabatlarni normallashtirishga intilish zarur”, — dedi bosh vazir.
O‘z navbatida, Kisida KXDRda saqlanayotgan Yaponiya fuqarolari muammosini hal qilishga va’da berdi. Bosh vazir, shuningdek, butun nutqini uning ma’muriyati xalqaro inson huquqlari masalalariga sodiqligini ta’kidlashga bag‘ishladi hamda ma’muriyatda erkinlik, demokratiya, inson huquqlari va qonun ustuvorligi hayotiy darajada muhim deb hisoblanishini keltirdi.
Fumio Kisida 4-oktabr kuni Yaponiyaning 100-bosh vaziri etib saylangan. Shu munosabat bilan mamlakatda yangi Vazirlar Mahkamasi tuzilgan edi. Biroq 14-oktabrda parlament quyi palatasi vakolat muddati tugashi munosabati bilan tarqatib yuborilgan, 31-oktabrda esa uning yangi tarkibi saylangan.
Parlament quyi palatasida bo‘lib o‘tgan saylovda Kisida mamlakatning 101-bosh vaziri etib qayta saylangan.
Izoh (0)