Urganch va Andijonda quyuq tuman hukm surayotgani sababli bir qator aviareyslar kechiktirilmoqda. Bu haqda Uzbekistan Airports xabar qildi.
Ma’lum qilinishicha, tuman sababli Moskvadan uchib kelayotgan “Aeroflot” aviakompaniyasiga tegishli bortida 131 yo‘lovchi bo‘lgan samolyot soat 06:40 da Urganch aeroportiga qo‘na olmagan va Nukusdagi zaxira aerodromiga yo‘l olgan.
Shuningdek, Uzbekistan Airways’ga tegishli Urganch—Toshkent reysi ham kechiktirilgan. Samolyot 08:20 da uchishi, Toshkentdan so‘ng Istanbulga parvoz qilishi kerak edi.
“Biroq Urganch aeroporti hali ham tuman bilan qoplangan. Ko‘rish masofasi 200 metrdan 400 metrgacha yaxshilangan. Uchish uchun maqbul ko‘rsatkich esa 800 metrni tashkil qiladi. Mutaxassislar fikricha, tuman 11:00 dan 11:30 gacha oraliqda tarqaladi”, — deyiladi xabarda.
Tuman Toshkent—Andijonga reysini ham kechiktirgan. Samolyot 08:30 da parvoz qilishi kerak edi, biroq qabul qiluvchi aeroportdagi tuman tufayli u hamon Toshkentda bo‘lib turibdi. Samolyot taxminan soat 12:00 da uchishi kutilmoqda.
Mavzuga doir:
- Uzbekistan Airways’ning Toshkentdan Namanganga uchgan samolyoti noqulay ob-havo sabab ortga qaytdi
- Uzbekistan Airways’ning Toshkent—Dushanbe reysi Tojikistonda kuzatilayotgan kuchli tuman sabab kechiktirildi
- Uzbekistan Airports Toshkent aeroportidan uchishi kerak bo‘lgan reyslarning kechiktirilishi to‘g‘risida ma’lumot berdi
Izoh (0)