Shavkat Mirziyoyev 6-dekabr kuni Qozog‘istonning Nur-Sulton shahridagi “Otan korg‘aushilar” (“Vatan himoyachilari”) monumentiga gul qo‘ydi, deb xabar bermoqda prezident matbuot xizmati.
Qayd etilishicha, ushbu yodgorlik Ikkinchi Jahon urushida halok bo‘lgan qozog‘istonlik jangchilar xotirasiga bag‘ishlab bunyod etilgan. Balandligi 37 metr bo‘lgan monument markazida vatan timsoli — ona tasvirlangan. Xorijiy davlatlar rahbarlari bu yodgorlikka gul qo‘yib, Qozog‘iston xalqiga hurmat-ehtiromini bildiradi.
Eslatib o‘tamiz, Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 5-dekabrdan buyon davlat tashrifi bilan Nur-Sultonda bo‘lib turibdi.
5-dekabr kuni ikki mamlakat yetakchilarining qisqa suhbati bo‘lib o‘tgandi.Tashrifning asosiy tadbirlari 6-dekabrga mo‘ljallangan. Oliy darajadagi muzokaralarda siyosiy muloqotni mustahkamlash, savdo-iqtisodiyot va transport-logistika sohalaridagi hamkorlikni rivojlantirish, madaniy-gumanitar aloqalarni faollashtirish iqtiqbollari muhokama qilinishi, mintaqaviy va xalqaro masalalar yuzasidan fikr almashilishi rejalashtirilgan.
Izoh (0)