AQSh razvedkasining maxfiy ma’lumotlariga ko‘ra, Xitoy Atlantika okeani sohilida joylashgan Ekvatorial Gvineyada harbiy baza qurishni rejalashtirmoqda. Bu haqda The Wall Street Journal gazetasi Amerika hukumatining kimligini oshkor etmagan vakillariga tayanib ma’lum qildi, deb xabar beradi “Interfaks”.
Gazetaning yozishicha, Xitoy shu orqali harbiylar uchun birinchi doimiy dislokatsiya punktiga ega bo‘lishi mumkin.
AQSh hukumati vakillari razvedka ma’lumotlarini batafsil oshkor etmagan, biroq ushbu hisobot Oq uy va Pentagonda katta xavotir uyg‘otgan. Oktabr oyida AQSh milliy xavfsizligi bo‘yicha masalahatchisining o‘rinbosari Jon Fayner Ekvatorial Gvineyaga mamlakat prezidenti Teodoro Obian Ngema Mbasogoni Xitoy taklifini rad etishga ko‘ndirish maqsadida tashrif buyurgandi.
“Dengiz sohasidagi diplomatiyamiz doirasida biz Ekvatorial Gvineyaga Xitoy faolligini o‘z ichiga oladigan ma’lum potensial qadamlar, milliy xavfsizlik nuqtayi nazaridan xavotirlarni keltirib chiqarishini aytdik”, — deya gazeta Amerika adminstratsiyasi vakilining so‘zlarini keltirgan.
Oq uydagi manbalardan birining qayd etishicha, Xitoyni Ekvatorial Gvineyada dengiz porti va mamlakatning eng yirik shahri Bata qiziqtirayotgan bo‘lishi mumkin: hozirda Gvineya ko‘rfazida Xitoy tomonidan qurilgan chuqur dengiz tijorat porti mavjud. The Wall Street Journal ma’lumotlariga ko‘ra, AQSh razvedkasi Xitoyning Ekvatorial Gvineyadan harbiy maqsadlarda foydalanishga bo‘lgan qiziqishini 2019-yilda payqagan. Avvalroq AQSh mudofaa sohasi vakillari Pekinning bu kabi rejalari haqida gapirgan edi.
WSJ’ning eslatishicha, Xitoy xorijdagi birinchi bazasini 2017-yilda Jibutida qurgan — u AQShning Afrikadagi 4,5 ming harbiy xizmatchisi joylashtirilgan Camp Lemonnier bazasi yaqinida. Shu bilan birga gazetaning ta’kidlashicha, so‘nggi 20 yil ichida Xitoy davlat kompaniyalari Afrikada 100 ta savdo portlarini qurgan. 2021-yilning bahorida AQSh razvedkasi Xitoy BAAdagi savdo portida maxfiy harbiy baza qurayotganini aniqlagan. Oqibatda Vashington BAA hukumatini ushbu qurilishni vaqtincha bo‘lsa-da, to‘xtatishga ko‘ndirgan. Bundan tashqari, Amerika rasmiylari Mavritaniyadagi mahalliy hokimiyatlarga Pekin tomonidan bu yerda qurilgan portdan harbiy maqsadlarda foydalanishga urinishlariga yo‘l qo‘ymaslikni tavsiya qilgani ma’lum bo‘lgan.
Pentagon tomonidan 2021-yilda Kongressga tayyorlangan hisobotda keltirilishicha, AQSh Mudofaa vazirligi Xitoy Keniya, Tanzaniya, Angola va Seyshel orollarida harbiy bazalarini qurish istiqbollarini ko‘rib chiqayotganini taxmin qilmoqda.
Avvalroq AQSh KXDR tomonidan ballistik raketalarning ishlab chiqarilishi mintaqadagi vaziyatni beqarorlashtirishini ma’lum qilgandi.
Izoh (0)