Indoneziyada Semeru vulqoni otilishi oqibatida 13 kishi halok bo‘ldi (foto)

Indoneziyaning Yava orolida Semeru vulqonining otilishi tufayli 13 kishi halok bo‘ldi. Bu haqda Lumajang okrugi hukumati rahbari Inda Ampervatiga tayanib, Detik nashri xabar berdi.

“Bugun yana 12 kishining jasadi topildi”, — dedi rasmiy. Bir kun oldin mahalliy aholidan birining o‘limi tasdiqlangan edi.

Tabiiy ofatlarni boshqarish milliy agentligi (BNPB) rasmiy vakili Abdul Muxariyning so‘zlariga ko‘ra, hozircha halok bo‘lganlardan faqat ikki nafarining shaxsi aniqlangan. Shu bilan birga, yana 98 kishi jumladan, ikki homilador ayol qaynoq lavadan kuygan yoki turli darajada jarohatlar olgan. Kamida 35 kishi kasalxonaga yotqizilgan, 902 kishi evakuatsiya qilingan.

Shuningdek, vulqon Lumajang hududidagi ikki tumanni Malang shahri bilan bog‘laydigan strategik ko‘prikni buzib yuborgan. Bir qancha uylarga jiddiy zarar yetgan.

Mahalliy aholining so‘zlariga ko‘ra, oldindan ogohlantirish tizimi ishlamagani uchun ko‘pchilik ertaroq qochishga ulgurmagan.

4-dekabr kuni taxminan 15:20 (Toshkent vaqti bilan 13:20) da Semeru vulqonining faolligi oshgan. Semeru — Yava orolidagi eng baland cho‘qqi, uning avvalgi otilishi joriy yilning yanvar oyida sodir bo‘lgan, o‘shanda mahalliy aholidan hech kim jabrlanmagan.

Indoneziyada bundan avval mart oyining boshida vulqon otilishi yuz bergandi. Indoneziyaning Sumatra orolida Sinabung vulqoni uyg‘ongan. O‘ndan ortiq otilishlar qayd etilgan. Vulqon kuli 5 kilometr balandlikka ko‘tarilgan.