Shavkat Mirziyoyev: “Yaqin qo‘shnilar yordamisiz afg‘on xalqi yakka holda qiyin sinovlardan o‘ta olmaydi”

Shavkat Mirziyoyev Turkmanistonning Ashxobod shahrida o‘tayotgan Iqtisodiy hamkorlik tashkilotining 15-sammitida nutq so‘zlab, Afg‘onistondagi bugungi vaziyat haqida to‘xtalib o‘tdi, deb xabar bermoqda prezident matbuot kotibi Sherzod Asadov.

“Ushbu mamlakat kun sayin og‘ir gumanitar inqirozga kirib bormoqda. Xalqaro hamjamiyat, jumladan, yaqin qo‘shnilar yordamisiz afg‘on xalqi yakka holda bu qiyin sinovlardan o‘ta olmaydi. Shu bois afg‘on xalqiga zarur yordam ko‘rsatish bo‘yicha sa’y-harakatlarni birlashtirish va umumiy yondashuvlarni ishlab chiqishimiz kerak.

Shuningdek, Afg‘oniston bilan mintaqaviy ahamiyatga ega bo‘lgan yirik savdo, transport va energetika loyihalarini amalga oshirish ishlarini izchil davom ettirish tarafdorimiz”, — degan Shavkat Mirziyoyev.

Eslatib o‘tamiz, Shavkat Mirziyoyev 9-sentabr kuni bo‘lib o‘tgan O‘zLiDePning X qurultoyida “Qo‘shni Afg‘oniston zaminida tinchlik va osoyishtalikni ta’minlashga, jafokash afg‘on xalqiga qo‘limizdan kelgan barcha yordamni ayamaymiz”, — deb aytgandi.

Prezident 5-oktabr kuni Turkmaniston prezidenti Gurbanguli Berdimuhamedov bilan muzokaralarda Afg‘oniston xalqiga zarur insonparvarlik yordamini ko‘rsatishni davom ettirishga tayyorligini yana bir bor aytib o‘tgan. Muzokaralarda Afg‘onistonda tinchlik va barqarorlik butun Markaziy Osiyo mintaqasida barqaror taraqqiyot garovi ekani ta’kidlangan.

O‘zbekiston prezidenti 21-sentabr kuni BMT Bosh Assambleyasining 76-sessiyasida videomurojaat bilan so‘zga chiqqanida ham Afg‘onistonni yakkalab, uni muammolar girdobiga tashlab qo‘yish mumkin emasligini aytgandi. “Bizning asosiy maqsadimiz — Markaziy Osiyoni farovon va barqaror rivojlanayotgan, ishonch va do‘stlik makoniga aylantirishdir. Buning uchun biz qo‘shni va yondosh mintaqalar bilan o‘zaro aloqalarni kuchaytirishga ustuvor ahamiyat qaratmoqdamiz”, — degan edi Shavkat Mirziyoyev.