Shavkat Mirziyoyev Iqtisodiy hamkorlik tashkiloti sammitida ishtirok etish, shuningdek, qator ikki tomonlama uchrashuvlar o‘tkazish uchun 28-noyabr kuni Turkmanistonning Ashxobod shahriga kelgandi. Davlat rahbari dastlab Turkmaniston prezidenti Gurbanguli Berdimuhamedov bilan muzokara o‘tkazib, ikki tomonlama yaxshi qo‘shnichilik va strategik sheriklik munosabatlarini rivojlantirishning dolzarb masalalarini muhokama qildi.

Shundan so‘ng Shavkat Mirziyoyev Pokiston prezidenti Orif Alviy bilan uchrashuv o‘tkazdi. Prezident matbuot xizmatining xabar berishicha, suhbat davomida O‘zbekiston—Pokiston ko‘p qirrali hamkorligini yanada kengaytirish masalalari ko‘rib chiqildi.

Foto: Prezident matbuot xizmati

Sheriklik aloqalari, eng avvalo iqtisodiyot yo‘nalishida jadal rivojlanib borayotgani katta mamnuniyat bilan qayd etildi. Mintaqa kun tartibidagi dolzarb masalalar, shu jumladan, Afg‘onistonda vujudga kelayotgan vaziyat muhokama qilindi.

Pokiston prezidentidan so‘ng Shavkat Mirziyoyev Tojikiston prezidenti Emomali Rahmon bilan ham uchrashuv o‘tkazdi.

Foto: Prezident matbuot xizmati

Davlat rahbarlari O‘zbekiston—Tojikiston strategik sheriklik munosabatlarini yanada mustahkamlash masalalarini ko‘rib chiqqan. Keng ko‘lamli savdo-iqtisodiy hamkorlikni yanada mustahkamlash muhim ekani qayd etilgan.

Shuningdek, sanoat, energetika, qishloq xo‘jaligi, transport, turizm va boshqa ustuvor sohalarda istiqbolli kooperatsiya loyihalarini amalga oshirishga alohida e’tibor qaratilgan. Yetakchilar Markaziy Osiyo mintaqasidagi vaziyatning rivojlanishi yuzasidan ham fikr almashgan.

Shavkat Mirziyoyev Ashxobod shahrida o‘tayotgan Iqtisodiy hamkorlik tashkiloti sammiti doirasida yana bir qator davlat rahbarlari bilan uchrashuv o‘tkazishi kutilmoqda.

IHTning 15-sammiti kun tartibidan savdo, investitsiyalar, “yashil” iqtisodiyot va innovatsiyalar, raqamli texnologiyalar, transport, logistika, turizm va boshqa ustuvor yo‘nalishlarda ko‘p qirrali hamkorlikni yanada kengaytirish masalalari o‘rin olgan. Ushbu tashkilotning 14-sammiti 4-mart kuni videoanjuman shaklida o‘tkazilgandi.