O‘zbekiston birja savdolarida Ai-80 markali benzinning narxi 20 foizgacha pasaydi

O‘zbekistonda noyabr oyining oxirlariga kelib benzin bozorida talab va taklifning mutanosibligi tiklanishi va narxlarning barqarorlashuvi kuzatilmoqda. Bu haqda Respublika tovar-xomashyo birjasi ma’lum qildi.

1–15-noyabr kunlari O‘zbekiston respublika tovar-xomashyo birjasida Ai-80 markali avtomobil benzinining o‘rtacha sotilish narxlari mahsulotning bir tonnasi uchun 8 million 690 ming so‘mdan 10 million 129 ming so‘mgacha, ya’ni 17 foizga o‘sgan edi.

Ma’lum qilinishicha, narxlar barqarorlashuvini ta’minlash maqsadida birjaning benzin bozorida taklif darajasini oshirish, birja savdolariga kichik lotlar (1 tonnalik)ni qo‘yish va xaridorlar uchun maksimal hajmlar (limit)ni o‘rnatish choralari ko‘rilgan. Bularning natijasida 15—26-noyabr kunlari Ai-80 markali benzinni birja savdolariga qo‘yish darajasi 3,6 marotabaga o‘sgan.

Bunda birja savdolariga qo‘yilgan benzin hajmida 1 tonnalik lotlarning ulushi 6 foizdan 57 foizgacha oshirilgan. Savdolarda ishtirok etgan va benzinni sotib olgan xaridorlarning soni esa 32 tadan 367 tagacha, ya’ni 11,4 barobarga oshgan. Mazkur davrda benzinning birjada shakllangan o‘rtacha narxlari mahsulotning bir tonnasi uchun 10 million 129 ming so‘mdan 8 million 101 ming so‘mgacha, ya’ni 20 foizga pasaygan.

“Benzinning bir tonnasi uchun sotilish narxi 15-noyabrga nisbatan 2 million 28 ming so‘mga, 1-noyabrga nisbatan esa 589,4 ming so‘mga arzonlashgan. O‘z navbatida, birja bozorida benzin narxlarining barqarorlashuvi chakana bozorlarda, ya’ni avtomobillarga yonilg‘i quyish shoxobchalari (AYoQSh)ning narxlarida ham o‘z aksini topmoqda”, — deyiladi xabarda.

Ma’lumot uchun, turli manbalarda keltirishicha, avtomobil benzinining bir tonnasi o‘rtacha 1293-1370 litrni tashkil qiladi.

Eslatib o‘tamiz, 17-noyabrdan buyon birja savdolarida Ai-80 benzinining narxida tushish kuzatilmoqda. Shu kuni savdolarda benzin narxi 9 million 365 ming so‘mgacha tushib, 15-noyabrga nisbatan 8 foizga arzonlashgan. 18-noyabr kuni esa 9 million 180 ming 500 so‘mga pasayib, 9 foizga arzonlashgan. 22-noyabr holatiga ko‘ra benzin narxi hamon tushishda davom etmoqda. Birja matbuot xizmatining ma’lum qilishicha, 15–21-noyabr kunlari benzinning kunlik o‘rtacha narxlari mahsulotning bir tonnasi uchun 10 129 400 so‘mdan 9 168 400 so‘mgacha, ya’ni 9,5 foizga pasaygan. 23-noyabr kuni O‘zbekiston birja savdolarida Ai-80 markali benzin narxi bir haftada 15 foizga arzonlashgani ma’lum bo‘ldi.