Toshkent viloyati hokimligi binosi atrofini o‘rab turgan panjaralar olib tashlandi, deb xabar beradi hokimlik matbuot xizmati.
Ma’lum qilinishicha, Nurafshon shahrida istiqomat qilayotgan aholi hamda mehmonlarning mazmunli dam olishlari uchun bir qator amaliy ishlar olib borilmoqda. Xususan, viloyat hokimligi binosiga yondosh hududda joylashgan “Amfiteatr” binosini qayta ta’mirlash hamda atrofida ko‘ngilochar maskanlarni tashkil etish yuzasidan amaliy ishlar davom etyapti.
Shuningdek, mazkur hududda “Yashil makon” umummilliy loyihasi doirasida yashil bog‘ tashkil etish maqsadida hokimlik binosi atrofidagi panjaralar olib tashlanib, o‘rniga daraxt ko‘chatlari ekish ishlari olib boriladi.
Ma’lumot uchun, mazkur loyihaning ishga tushish vaqti 2022-yilga mo‘ljallangan. Bog‘ va “Amfiteatr” binosi to‘liq foydalanishga topshirilgach, 150 ta ish o‘rni yaratiladi.
Eslatib o‘tamiz, 2021-yilning avgust oyida Koson tumani hokimligi panjaralari o‘sha paytdagi Qashqadaryo viloyati hokimi Zoir Mirzayev (hozirda Toshkent viloyati hokimi) tanqididan so‘ng olib tashlangan edi. Tuman ma’muriyati fuqarolar bilan ishlashda ochiqlik va oshkoralikka doim amal qilinishi, hokimlik xalq bilan o‘rtadagi har qanday to‘siqni olib tashlash tarafdori ekanini ma’lum qilgan edi.
Izoh (0)