Olmazor tumani hokimligi mansabdori 12 gektar yerni 1,5 mln dollar evaziga olib bermoqchi bo‘lganida ushlandi (video)

Davlat xavfsizlik xizmati Olmazor tuman hokimligi mansabdorini pora olayotganida qo‘lga oldi. U 12 gektar yerni 1,5 million dollar evaziga olib bermoqchi bo‘lgan.

Ma’lum bo‘lishicha, Toshkent shahar Olmazor tumani hokimligining mansabdor shaxslaridan biri noqonuniy daromad olish maqsadida, 1978 va 1980-yillarda tug‘ilgan ikki nafar fuqaro bilan kelishgan holda, tadbirkorlik bilan shug‘ullanmoqchi bo‘lgan shaxsning ishonchiga kirgan.

Unga plastik trubalar ishlab chiqaruvchi zavod qurishi uchun yuqori lavozimda ishlovchi tanishlari orqali Toshkent viloyatining Zangiota tumani hududidan 12 gektar yer maydoni olib berish evaziga 1 million 560 ming dollar talab qilgan.

DXXning Toshkent viloyati bo‘yicha boshqarmasi xodimlarining viloyat prokuraturasi hamda iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazgan tezkor tadbiri davomida, ular Toshkent shahridagi restoranlardan birida avans sifatida 50 ming dollarni olgan vaqtlarida ashyoviy dalillar bilan ushlangan.

Avvalroq Toshkentda yerni noqonuniy olib bermoqchi bo‘lgan xonanda DXX tomonidan qo‘lga olingani, Namanganda tuman soliq inspeksiyasi boshlig‘i 15 ming dollar, Xorazm viloyati Favqulodda vaziyatlar boshqarmasi xodimi 30 ming dollar pora olayotganida ushlangani haqida xabar berilgan edi.