Namangan viloyati Chortoq tumanida ikki erkak o‘rtasida yuzaga kelgan janjalni to‘xtatishga uringan profilaktika inspektori pichoqlandi. Bu haqda viloyat IIB matbuot xizmati xabar berdi.
Ma’lum bo‘lishicha, fuqarolardan biri tanishiga 2020-yil dekabr oyida 4,5 million so‘m qarz bergan. Biroq u salkam bir yildan buyon qarzini qaytarib ololmagani sabab tuman IIBga murojaat qilib, pulni undirib berishni so‘ragan.
Profilaktika katta inspektori kapitan O.B. arizachi bilan qarzdorning uyiga borib, vaziyatni tushuntirgan.
Qarzdor ichki ishlar bo‘limiga borishi kerakligini eshitgach, uyiga kirib ketib, oshxona pichog‘i bilan chiqqan va tanishiga tashlangan. Ikki erkakni ajratishga uringan inspektorga pichoq orqali jarohat yetkazilgan. O‘g‘ir tan jarohati olgan xodim arizachining mashinasida tuman tibbiyot birlashmasiga olib kelingan.
Ko‘rsatilgan tezkor yordam natijasida inspektorning hayoti saqlab qolingan.
Avvalroq Jizzaxda YPX xodimini urib, uning “pogon”ini yechib olgan haydovchi hibsga olingani, Buxoroda profilaktika inspektorini urgan erkakka nisbatan jinoyat ishi qo‘zg‘atilgani to‘g‘risida xabar berilgandi.
Izoh (0)