Bog‘dorchilik va issiqxona xo‘jaligini rivojlantirish agentligiga yangi direktor tayinlandi

Hukumat qarori bilan Husnidin Karimov Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi direktori etib tayinlandi. Bu haqda Telegram’dagi “Huquqiy axborot” kanali xabar berdi.

Shu kungacha agentlikni Nasriddin Najimov boshqarib kelayotgandi.

Eslatib o‘tamiz, mazkur agentlik prezidentning 2019-yil 21-martdagi “O‘zbekiston Respublikasida bog‘dorchilik va issiqxona xo‘jaligini yanada rivojlantirish chora-tadbirlari to‘g‘risida”gi qaroriga binoan tashkil etilgan bo‘lib, bog‘dorchilik va issiqxona xo‘jaliklarini barqaror rivojlantirishni ta’minlashga qaratilgan maqsadli kompleks dasturlarni ishlab chiqishi va amalga oshirishi belgilangan.

Agentlik direktori maqomi, mehnatga haq to‘lash, tibbiy va transport xizmati ko‘rsatish shartlari bo‘yicha vazir o‘rinbosariga tenglashtirilgan.

Avvalroq Toshkent shahar Obodonlashtirish bosh boshqarmasiga yangi rahbar tayinlangani, Toshkent shahar Ekologiya va atrof-muhitni muhofaza qilish boshqarmasi rahbari o‘zgargani to‘g‘risida xabar berilgandi.