Bandlik va mehnat munosabatlari vazirligi ijtimoiy tarmoqlarda tarqalgan Toshkent viloyatining Yuqori Chirchiq tumanidagi maktab o‘quvchilari majburiy mehnatga jalb etilayotgani tasvirlangan video yuzasidan ma’lumot berdi.
Ijtimoiy tarmoqlarda Yuqori Chirchiq tumani 23-maktab rahbariyati o‘quvchilarni majburiy mehnatga jalb qilayotgani aytilgan video tarqaldi va bu bo‘yicha Toshkent viloyati Bandlik bosh boshqarmasi Davlat mexnat inspeksiyasi tomonidan o‘rganish o‘tkazilgan.
Natijaga ko‘ra sinf rahbari tomonidan o‘quvchilar haqiqatan ham 15-noyabr kuni dars vaqtida maktabning hovlisida va tashqari hududda majburiy tarzda ishlatilgani aniqlangan. Shuningdek, bu kabi holat haftasiga ko‘p marotaba takrorlanib kelayotgani o‘z tasdig‘ini topgan.
Toshkent viloyati Bandlik bosh boshqarmasi Davlat mexnat inspeksiyasi tomonidan Voyaga yetmaganlarning mehnatidan ma’muriy tarzda majburlash yo‘li bilan foydalangani yuzasidan dalolatnoma rasmiylashtirilib, Jinoyat kodeksining 148²-moddasiga (mehnat qilish huquqini buzish) asosan qonuniy chora ko‘rishlik uchun Toshkent viloyati prokuraturasiga yuborilgan.
Avvalroq Qashqadaryoda o‘qituvchilarni obodonlashtirish ishlariga jalb etgan maktab direktori 21,6 mln so‘m jarimaga tortilgani, Sirdaryoda o‘qituvchilarni majburiy mehnatga jalb qilgan maktab direktori 12 mln so‘m jarimaga tortilgani, Qashqadaryoda o‘qituvchilarni majburiy mehnatga jalb qilgan direktor ishdan olingani haqida xabar berilgan edi.
Izoh (0)