Farg‘ona viloyatida 2021-yilning yanvar—sentabr oylarida jinoyat sodir etib, sudlangan yoshlarning 84,4 foizi ishsizlar ekani ma’lum bo‘ldi. Bu haqda O‘zA xabar qildi.
Xabar qilinishicha, 2021-yil 9 oyida 3118 nafar yoshlarga nisbatan 2618 ta jinoyat ishi sudlar tomonidan mazmunan ko‘rib hal etilgan. Shundan 304 nafarini voyaga yetmaganlar tashkil etgan.
Qayd etilishicha, ularning 16 nafari qasddan badanga og‘ir shikast yetkazish, 19 nafari qasddan badanga o‘rtacha og‘ir shikast yetkazish, 14 nafari yengil tan jarohati yetkazish, 32 nafari talonchilik, 23 nafari firibgarlik, 177 nafari o‘g‘irlik, 10 nafari transport vositalari harakati yoki ulardan foydalanish xavfsizligi qoidalarini buzish, 13 nafari bezorilik jinoyatlarini sodir etgan.
Jinoyat sodir etgan yoshlarning mashg‘uloti tahlil qilinganda ularning 2632 nafari yoki 84,4 foizini ishsiz yoshlar tashkil etishi aniqlangan.
Ma’lumot uchun, Farg‘ona viloyatida 18 yoshdan 30 yoshgacha bo‘lgan 703 ming nafar yoshlarning 81 ming nafari ishsiz bo‘lib, 35 ming nafari xorijga chiqib ketgan. Hisobga olinmagan ishsiz yigit-qizlar soni 100 mingdan ziyod.
Eslatib o‘tamiz, O‘zbekistonda 2020-yilda 9 ming nafardan ortiq ishsiz jinoyat sodir etgani xabar qilingandi. Shuningdek, Shavkat Mirziyoyev 2021-yilning 1-may va 1-iyunidan boshlab tadbirkorlar va ishsiz yoshlarga bir qator imtiyozlar berilishini ma’lum qilgan.
Izoh (0)