DXX Namangan, Farg‘ona va Toshkent viloyatlarida 2,4 mlrd so‘mlik noqonuniy tovarlar kontrabandasiga chek qo‘ydi

Davlat xavfsizlik xizmati Chegara qo‘shinlari harbiy xizmatchilari Namangan, Farg‘ona va Toshkent viloyatlarida jami 2,4 milliard so‘mlik noqonuniy tovarlar kontrabandasiga chek qo‘ydi. Bu haqda Chegara qo‘shinlari matbuot xizmati xabar qildi.

Ma’lum bo‘lishicha, Namangan viloyati Yangiqo‘rg‘on tumanidagi “Qizilyozi” blokpostida Chegara qo‘shinlari harbiy xizmatchilari Namangan tumani ichki ishlar bo‘limi xodimlari bilan hamkorlikda tezkor tadbir o‘tkazgan. Unda Nanay–Namangan yo‘nalishida O‘zbekiston fuqarosi boshqaruvida harakatlanib borayotgan Lacetti belgilangan tartibda to‘xtatilib tekshirilganda mashinadan bojxona qoidalarini buzib, chegaradan olib o‘tilgan, chet elda ishlab chiqarilgan, umumiy narxi 150 million so‘mga teng uyali aloqa vositalari borligi aniqlangan.

Shuningdek, shu blogpostda Nanay—Chortoq yo‘nalishida harakatlanib borayotgan Hyundai mashinasi tekshirilganda chegaradan noqonuniy yo‘llar bilan mamlakatga olib kirilgan, umumiy qiymati 400 million so‘mga teng oziq-ovqat, qishloq xo‘jaligi va maishiy texnika vositalari qo‘lga olingan.

Bundan tashqari, Toshkent viloyati “Chinor” yo‘l-patrul maskanida Hyundai mashinasi tekshirilganda uning salonida chet elda ishlab chiqarilgan, tegishli hujjatlarga ega bo‘lmagan 1 milliard 576 ming so‘mlik parfyumeriya mahsulotlari borligi aniqlangan.

Shu bilan birga, Farg‘ona viloyatida 139 million so‘mlik parfyumeriya mahsulotlari, 342 million so‘mlik uyali aloqa vositalari, Andijon viloyatida 102 million so‘mlik kiyim-kechaklar, Toshkent viloyatida esa 270 million so‘mlik tamaki mahsulotlar kontrabandasiga chek qo‘yilgan.

Qayd etilishicha, bu kabi holatlar bo‘yicha jami 2 milliard 403 million 576 ming so‘mlik noqonuniy tovarlar olib o‘tilishining oldi olingan. Hozirda sodir etilgan huquqbuzarliklar yuzasidan tegishli idoralar tomonidan surishtiruv ishlari olib borilmoqda.