Energetika vazirligi shtabi tomonidan 17-noyabr kuni Toshkent viloyatining Chirchiq shahrida joylashgan Shirina Petrol va Toshkent tumanida joylashgan Clean Gas Service MChJlarga qarashli avtomobillarga gaz to‘ldirish kompressor shoxobchalarida tabiiy gazdan foydalanish qoidalariga rioya etilishi yuzasidan tekshirish o‘tkazildi, deb xabar beradi vazirlik matbuot xizmati.
O‘rganish davomida bu ikki tadbirkor tomonidan 1 million 635 ming kub metr yoki bugungi kunda 100 ming aholi xonadonlarining bir kunlik iste’moliga yetarali miqdordagi tabiiy gazdan noqonuniy foydalanilgani aniqlangan.
Xususan, tekshirish davomida Shirina Petrol MChJ tomonidan elektron gaz hisoblash uskunasiga tashqi ta’sir ko‘rsatish imkoni bo‘lgani va o‘tkazilgan eksperement davomida konfiguratsiya sozlamasi texnologik yo‘riqnomalar talabiga mos emasligi sababli qayta hisob-kitob qilinishi natijasida 1 milliard 274 million 700 ming so‘m zarar yetkazilgani ma’lum bo‘lgan.
Shuningdek, Clean Gas Service MChJ tomonidan shartnoma hujjatlaridan tashqari 1 dona kompressor uskuna ortiqcha o‘rnatilgani sababli amalga oshirilgan qayta hisob-kitob natijasida 360,5 million so‘m zarar yetkazilgani aniqlangan.
Yuqoridagilardan kelib chiqib, o‘tkazilgan tekshirish hujjatlar qonun doirasida chora ko‘rilishi uchun huquqni muhofaza qilish organlariga yuborilgan.
Avvalroq O‘zbekistondagi gaz zapravkalarining ish vaqtiga cheklov o‘rnatilgani, O‘zbekistonda oktabr oyida deyarli 4 mlrd so‘mlik gazdan noqonuniy foydalanilgani aniqlangani, O‘zbekiston aholisining tabiiy gazdan qarzdorligi 500 mlrd so‘mdan oshgani to‘g‘risida xabar berilgandi.
Izoh (0)