O‘zbekiston o‘z tarixida ilk bor BMT Inson huquqlari bo‘yicha kengashi (IHK) byurosi faoliyatida ishtirok etadi, deb xabar bermoqda “Dunyo” agentligi
Qayd etilishicha, Osiyo—Tinch okeani mintaqaviy guruhiga a’zo davlatlar O‘zbekistonning Jeneva shahridagi BMT bo‘linmasi va boshqa xalqaro tashkilotlardagi doimiy vakili nomzodini 2022-yil uchun BMT Inson huquqlari bo‘yicha kengashi raisining o‘rinbosari lavozimiga bir ovozdan qo‘llab-quvvatladi.
BMT Inson huquqlari bo‘yicha kengashi byurosi tarkibi IHK raisi hamda uning turli geografik guruhlardan saylangan to‘rtta o‘rinbosaridan tashkil topgan. O‘zbekistonning doimiy vakili nomzodi ko‘rsatilgan Osiyo—Tinch okeani mintaqasi BMT IHK tizimidagi eng yiriklardan biri hisoblanadi. Guruhda 56 ta davlat bor.
“O‘zbekiston vakilining ushbu lavozimga saylanishi respublikamizda inson huquqlari sohasida amalga oshirilayotgan keng ko‘lamli islohotlarning jahon hamjamiyati tomonidan ijobiy baholanayotganining ifodasidir”, — deyiladi agentlik xabarida.
Eslatib o‘tamiz, 2018-yildan buyon Jenevadagi BMT bo‘linmasi va boshqa xalqaro tashkilotlardagi O‘zbekistonning doimiy vakili Ulug‘bek Lapasov hisoblanadi.
2020-yil oktabrida O‘zbekiston 2021—2023-yillar mobaynida BMT Inson huquqlari bo‘yicha kengashining to‘laqonli a’zosi etib saylangan va tashkilot doirasida faol ish olib bormoqda. 2021-yil oktabrida O‘zbekiston tashabbusi bilan kengash tomonidan Pandemiya davrida yoshlar huquqlari to‘g‘risidagi birinchi rezolyutsiyasi qabul qilindi. Mazkur hujjat BMT IHKning barcha a’zolari tomonidan qo‘llab-quvvatlandi va 60 ga yaqin davlat unga hammualliflik qildi.
BMT IHK tarkibiga 47 davlat kiradi hamda butun dunyo bo‘ylab inson huquqlarini ilgari surish va himoya qilishga mas’ul tuzilma hisoblanadi. Kengash vakolatiga inson huquqlari sohasidagi e’tiborga molik bo‘lgan barcha masalalar va vaziyatlarni muhokama qilish kiradi.
Kengash majlislari BMTning Jenevadagi vakolatxonasida o‘tkaziladi.
Izoh (0)