Fransiyada koronavirus tarqalishining beshinchi to‘lqini “yashin tezligida” boshlanmoqda. Bu haqda hukumat vakili Gabriel Attalga tayanib, “RBK” xabar berdi.
Uning ta’kidlashicha, koronavirusga chalinganlarning bir haftalik o‘sishi hozirda qariyb 80 foizni tashkil etmoqda, 100 ming aholiga to‘g‘ri keladigan kasallar soni yetti kundan kamroq vaqti ichida 100 dan 164 taga o‘sgan. 20 minutes portalining yozishicha, 13-noyabr kuni mamlakatda 9458 kishida koronavirus tasdiqlangan bo‘lsa, 20-noyabrda ularning soni 17 153 nafarni tashkil etgan. Bu kabi ko‘rsatkich pandemiyaning tez rivojlanayotganidan dalolat beradi: oldinlari bu kabi o‘sish bir haftada emas, balki uch hafta ichida sodir bo‘lgan.
“Biz kasalikka chalinish holatlarining juda tez o‘sayotganini ko‘ryapmiz, ammo biz, shuningdek, Fransiyada vaksinatsiya ko‘lami juda kengligini bilamiz va biz revaksinatsiya bo‘yicha qo‘shnilarimizdan ancha oldindamiz”, — deydi hukumat vakili.
Shunga qaramay, bu kabi vaziyatda hukumat “sanitariya hujjatlari” — vaksinatsiya yoki kasallikdan tuzalgani to‘g‘risidagi sertifikatlardan foydalanish bo‘yicha nazoratni kuchaytiradi. So‘nggi kunlarda ulardan foydalanishni tekshirish oshgan. To‘rt kun ichida fuqarolarga nisbatan 70 ming va korxonalarga nisbatan esa 4,3 mingdan ortiq tekshiruv o‘tkazilgan.
Fransiya parlamenti iyul oyi oxirida koronavirus tarqalishida inson xavfsizligini tasdiqlovchi “sanitariya hujjatlari” to‘g‘risidagi qonun loyihasini ma’qullagan. U Pfizer, Moderna, AstraZeneca va Johnson & Johnson vaksinalari bilan emlanganlarga, shuningdek, kasallikdan tuzalgan yoki PZR-test natijasi salbiy bo‘lganlarga beriladi.
Avgust oyidan boshlab bu kabi hujjat majburiyga aylangan. Uning yordamida savdo markazlari, kafe yoki restoranlar, muzeylar, attraksionlar va kinoteatrlarga tashrif buyurish mumkin.
Izoh (0)