O‘zbekiston Prezidentining topshirig‘iga asosan birinchi marotaba O‘zbekiston milliy atlasi yaratildi, deb xabar beradi Kadastr agentligi axborot xizmati.
Ma’lum qilinishicha, O‘zbekiston milliy atlasi 416 ta xaritalarni o‘zida jamlagan 2 jilddan iborat bo‘lib, O‘zbekistonning barcha sohalarini kartografik va matnli ko‘rinishda tavsiflovchi fundamental ilmiy-ma’lumotnoma asari hisoblanadi.
Atlasda respublikaning “Tabiiy-geografik o‘rni va umumiy xususiyatlari”, “Tabiiy sharoiti va tabiiy resurslari”, “Ekologiya va atrof-muhit muhofazasi”, “Aholisi”, “Ijtimoiy” va “Iqtisodiyot sohalari” hamda “Tarixi” aks ettirilgan.
Milliy atlas, Davlat soliq qo‘mitasi huzuridagi Kadastr agentligi va “Kartografiya” davlat ilmiy-ishlab chiqarish korxonasining 100 dan ortiq mutaxassislari, Fanlar akademiyasining yetuk olimlari, vazirlik va idoralarning vakillari hamda oliy ta’lim va boshqa ilmiy maqomga ega bo‘lgan tashkilotlardan jalb etilgan ekspertlar hamkorligida yaratilgan.
Eslatib o‘tamiz, 2020-yilning oktabrida O‘zbekiston milliy atlasi yil yakuniga qadar nashrdan chiqishi rejalashtirilayotgani ma’lum qilingandi. O‘shanda atlas Vazirlar Mahkamasining 2018-yil 15-martdagi 204-sonli farmoyishiga asosan yaratilayotgani ta’kidlangandi.
Izoh (0)