Yevropa Ittifoqi Polsha chegarasidagi migratsiya bilan bog‘liq vaziyat sabab Minsk aeroportiga qarshi cheklovlar joriy etish imkoniyatini ko‘rmoqda. Bu haqda Financial Times’ga tayanib, “Kommersant” xabar berdi. Bundan tashqari, 20 nafar Belarus amaldori, “Minsk” mehmonxonasi va Suriyaning Cham Wings Airlines aviakompaniyasiga qarshi sanksiyalar qo‘llanilishi mumkin.
Manbalarning ta’kidlashicha, Yevropa Ittifoqi davlatlari hozircha aeroportga qarshi sanksiyalar joriy etish masalasida yagona qarorga kelmagan. Bu yuridik murakkabliklar bilan bog‘liq. “Minsk” mehmonxonasiga qarshi cheklovlarni qo‘llash rejasiga u yerga migrantlar joylashtirilayotgani sabab bo‘lmoqda. Taxminlarga ko‘ra, YI o‘z ittifoqdoshlari bilan harakatlarini kelishib olib, yakuniy sanksiyalar ro‘yxatini shakllantirishga bir necha hafta vaqt ketadi.
Avvalroq Bryussel Polsha bilan chegaradagi migratsiya inqirozi sabab Belarusga qarshi sanksiyalarni kengaytirish niyatini e’lon qilgandi. Reuters manbalarining ma’lum qilishigacha, cheklovlar 30 nafar jismoniy va yuridik shaxslarga nisbatan qo‘llanilishi mumkin. Belarus prezidenti Aleksandr Lukashenko sanksiyalarning kengaytirilishiga nisbatan Yamal—Yevropa gaz quvurini uzib qo‘yish bilan tahdid qilgan. Saksiyalar ehtimolligi fonida Cham Wings Airlines Minskka reyslarini bekor qilgan.
Mavzuga doir:
Izoh (0)