O‘zbekistonning IT Queens jamoasi AI Journey 2021 xalqaro konferensiyasiga bag‘ishlangan tanlov nominatsiyalaridan birida g‘olib chiqdi. Bu haqda IT Park matbuot xizmati ma’lumotlariga tayanib, Spot xabar berdi.
Qayd etilishicha, jamoa a’zolari — Yuliana Lutsenko, Anastasiya Koroleva, Lana Nasrulina, Kseniya va Anastasiya Badyan 2 hafta ichida sun’iy intellekt sohasida loyiha ishlab chiqdi. Ularning ishlanmasi 99 foiz aniqlik bilan “dipfeyk” materiallarni aniqlay oladi.
Ushbu loyiha o‘zbekistonlik ishlab chiquvchilar tomonidan taqdim etilgan 500 dan ortiq loyihalar ichida eng yaxshisi deb topilgan. IT Queens jamoasi Data Lady nominatsiyasida g‘olib sifatida tanlovning xalqaro bosqichiga chiqqan.
Qizlar Moskvada tashkil etilgan AI Journey 2021 xalqaro konferensiyasida chiqish qilib o‘zlari ishlab chiqqan loyihani tadbir ishtirokchilariga namoyish qilgan — ular qatorida Rossiya prezidenti Vladimir Putin ham bo‘lgan.
Rossiya rahbari bunday ishlanmalar yordamida odamlar uchun foydali bo‘lgan “qiziqarli, chiroyli, ommabop” mahsulotlar yaratish mumkinligini qayd etgan.
“Eng asosiysi, zamonaviy texnologiyalar orqali odamlar huquqlari poymol etilgan taqdirda, ularning manfaatlarini sun’iy intellekt va zamonaviy texnologiyalar yordamida himoya qilish yo‘llarini topyapsiz”, — deb ta’kidlagan Putin.
“Dipfeyk” (deepfake) — insonning haqiqiy fotosuratlari yoki videolari asosida sun’iy intellekt tomonidan yaratilgan sintezlangan tasvir. Mazkur texnologiyadan ushbu shaxs nomidan boshqa birovni shantaj qilish, obro‘sizlantirish yoki firibgarlik uchun tobora ko‘proq foydalanilmoqda.
Izoh (0)