Andijonda 5 erkak tomonidan zo‘rlanganini aytgan kelinchakka nisbatan ikki yarim yil muddatga ozodlikni cheklash jazosi tayinlandi. Bu haqda “Daryo” muxbiri xabar bermoqda.
Bundan besh yarim oy avval Andijon viloyatida 5 oylik kelinchak besh kishi tomonidan zo‘rlangani haqida ijtimoiy tarmoqlarda xabarlar tarqaldi. Unda kelin dala shiyponida idishlarni yuvish uchun chiqqanida, uni ko‘rgan spirtli ichimlik ta’sirida bo‘lgan 5 nafar erkaklar majburlab shiyponga olib kirib, qo‘l-oyog‘ini bog‘lab, zo‘rlagani aytilgan. Kelinning yaqinlari uni zo‘rlagan erkaklarga qonuniy chora ko‘rishni so‘ragan.
Shundan so‘ng Senatning Xotin-qizlar va gender tenglik masalalari qo‘mitasi, Mahalla va oilani qo‘llab-quvvatlash vazirligi, shuningdek, jinoyat ishini ichki ishlar vaziri shaxsan nazoratga olgani ham ma’lum qilingandi.
29-may kuni Ichki ishlar vazirligi axborot xizmati sud-tibbiy ekspertizasining xulosasiga ko‘ra, jabrlanuvchining badanida zo‘rlik alomatlari bilan bog‘liq tan jarohatlari mavjud emasligi, 13-14 haftalik homilador ekani va homilasi rivojlanayotgani aniqlangan.
Tergov harakatlari davomida to‘plangan inkor qilib bo‘lmas dalillarga asosan kelinchak O.O.ning zo‘rlangani to‘g‘risidagi vajlari o‘z tasdig‘ini topmagani sababli jinoyat ishining gumon qilinuvchilarga tegishli qismini Jinoyat-protsessual kodeksining 83-moddasiga (jinoiy hodisa yuz bermagan yoki shaxsning qilmishida jinoyat tarkibi bo‘lmasa) asosan tugatish masalasi ko‘rib chiqilayotgani, fuqaro O.O. va boshqalarning tuhmat qilgani holatiga huquqiy baho berish maqsadida tergov harakatlari davom ettirilayotgani ma’lum qilingandi.
Afsuski, oradan besh oydan ortiq vaqt o‘tgan bo‘lsa-da ichki ishlar vazirligidan tortib, bosh prokuratura, hattoki sud tomonidan ham tergov harakatlari natijasi yuzasidan ommaviy axborot vositalarida hech qanday qo‘shimcha yoki yakuniy ma’lumot berilmagandi.
Noyabr oyi boshida “Daryo” muxbiri viloyat prokuraturasi axborot xizmati bilan bog‘lanib, tergov harakatlari yakuni bo‘yicha ma’lumot taqdim etishni so‘radi.
Viloyat prokuraturasi ma’lumotlariga ko‘ra, 2021-yilning 26-iyun kuni O.O.ga nisbatan Jinoyat kodeksining 139-moddasi 3-qismi (nashr qilish yoki boshqacha usulda ko‘paytirilgan matnda yoxud ommaviy axborot vositalari orqali; og‘ir yoki o‘ta og‘ir jinoyat sodir etishda ayblab; og‘ir oqibatlar kelib chiqishiga sabab bo‘lgan holda; g‘arazgo‘ylik yoki boshqa past niyatlarda qilingan tuhmat) bandlari va boshqa moddalari (aynan qaysi moddalar ekaniga aniqlik kiritilmagan) bilan ayblov e’lon qilinib, “shaxsiy kafillik” ehtiyot chorasi qo‘llanilgan.
Jinoyat ishi ayblanuvchi O.O. va uning himoyachisiga tanishtirilgan va jinoyat ishi bo‘yicha ayblov xulosasi tuzilib, Jinoyat protsessual kodeksining 388-moddasi tartibida sud muhokamasiga yuborilgan. Biroq “Daryo” muxbirining ushbu holat yuzasidan Andijon viloyat sudiga qilgan so‘rovi bo‘yicha hech qanday ma’lumot berilmagandi.
Viloyat sudi matbuot xizmatining ma’lum qilishicha, 2021-yil 10-sentabr kuni Jinoyat ishlari bo‘yicha Bo‘ston tumani sudi tomonidan sudlanuvchi O.O.ga nisbatan sud ishi tegishli tartibda ko‘rib chiqilgan.
Sudning hukmiga ko‘ra, sudlanuvchi O.O. Jinoyat kodeksining 139-moddasi 3-qismining “a” bandi (og‘ir yoki o‘ta og‘ir jinoyat sodir etishda ayblab tuhmat qilish) bilan aybli deb topilgan. Unga nisbatan 2 yil 6 oy ozodlikni cheklash jazosi tayinlangan.
Izoh (0)