“Interfaks” Polsha—Belarus chegarasida to‘plangan noqonuniy muhojirlar aks etgan suratlarni e’lon qildi.
Ma’lum bo‘lishicha, 8-noyabr kuni chegaradagi vaziyat yomonlashgan. Bir necha ming muhojir Belarus tomondan Yevropa Ittifoqiga ko‘chib o‘tish istagida bo‘lgan.
Yevrokomissiya Belarus hukumatini muhojirlar oqimini uyushtirganlikda va Yevropa Ittifoqiga kirishga ruxsat ololmagan migrantlarni ortga qaytarmaganlikda ayblamoqda.
Eslatib o‘tamiz, 24-oktabr kuni Belarusdan 60 ga yaqin noqonuniy muhojir Polsha hududiga kirishga uringan, oqibatda ikki askar yaralangandi. Shuningdek, internetda Belarusdan Polshaga ketayotgan qochqinlar karvonini aks ettiruvchi videolar tarqalgan. Polsha hukumati chegarani buzishga tayyorgarliklar haqida ogohlantirgandi.
Bundan tashqari, Litvada bahordan migratsiya inqirozi boshlangani, mamlakatga Yaqin Sharq va Afrika mamlakatlaridan yuzlab fuqarolar — bari Belarus orqali — kirib kelayotgani xabar qilingandi. Qayd etilishicham 2020-yil bilan solishtirganda noqonuniy muhojirlar oqimi 39 baravarga ko‘paygan. Lukashenko muhojirlarning Litva bilan chegaradan noqonuniy o‘tishiga Belarus rasmiylari xalal bermasligini ochiqchasiga aytib, buni gibrid urush deb atagan.
Litvada iyul oyining oxirida favqulodda holat rejimi joriy qilingandi. Mamlakat Belarus bilan chegarada to‘siq qurishni boshlagan. Shuningdek, Litva hukumati o‘z ixtiyori bilan mamlakatni tark etishga rozi bo‘lgan noqonuniy muhojirlarga 300 yevrodan to‘lashga va’da bermoqda. Kecha, 9-oktabr kuni esa Litva hukumati Belarus bilan chegarada favqulodda holat joriy etilishini ma’qullagani haqida xabar berildi.
Bundan tashqari, oktabr oyida Germaniya chegarasini bir oy ichida 1,3 ming muhojir noqonuniy kesib o‘tishga uringani ma’lum qilingan. Qayd etilishicha, Belarus va Yevropa Ittifoqi chegarasidagi migratsion inqiroz Aleksandr Lukashenkoning Minsk endi Yevropani muhojirlardan himoya qilmoqchi emasligini aytganidan keyin boshlangan. Shundan so‘ng, ommaviy axborot vositalarida xabar berilishicha, belaruslik chegarachilar chegarani noqonuniy kesib o‘tmoqchi bo‘lgan odamlarga jiddiy to‘sqinlik qilmaslik haqida yashirin ko‘rsatma olgan.
Izoh (0)