O‘zbekiston terma jamoasi bilan uchrashgan Abdusalom Azizov, faoliyati xavf ostida qolgan Aguero va “Barselona”ga qaytayotgan Dani Alves. Eng so‘nggi sport yangiliklari

Dunyo va o‘zbek sportiga oid 12-noyabr kunining eng muhim xabarlari dayjesti bilan tanishing.

O‘zbekiston

O‘zbekiston futbol assotsiatsiyasi Prezidenti Abdusalom Azizov Gruziyaga qarshi bahs oldidan milliy terma jamoa a’zolari bilan uchrashdi. Bu haqda O‘FA matbuot xizmati xabar berdi.

Assotsiatsiya rahbari milliy jamoa oldida turgan keyingi musobaqalar mas’uliyati, ularga tizimli tayyorgarlik ko‘rish, har bir o‘yinda sidqidildan harakat qilish lozimligi haqida fikr bildirgan.

Shuningdek, futbolchi va murabbiylar bilan o‘tgan suhbatda ijobiy natijalarga erishish uchun O‘FA tomonidan barcha zarur sharoitlar taqdim etilishi ma’lum qilingan.

Eslatib o‘tamiz, O‘zbekiston milliy terma jamoasi 16-noyabr kuni Tbilisida Gruziyaga qarshi o‘rtoqlik o‘yinida maydonga tushadi.

O‘zbekiston Kubogi yarim final bahslari qachon o‘tkazilishi ma’lum bo‘ldi

Futbol bo‘yicha O‘zbekiston Kubogi 1/2 finalidan o‘rin olgan bahslar 24-noyabr kuni bo‘lib o‘tadi.

Unda quyidagi juftliklar bahs yuritadi: “OKMK” — “Nasaf”, “Paxtakor” — “Bunyodkor”.

Superliganing so‘nggi tur o‘yinlari bir vaqtda boshlanadi

Futbol bo‘yicha O‘zbekiston Superligasining 26-tur o‘yinlari boshlanish vaqtlari ma’lum bo‘ldi.

Professional futbol ligasining (PFL) ma’lum qilishicha, so‘nggi turdan o‘rin olgan bellashuvlar 27-noyabr kuni bir vaqtda (15:00 da) bo‘lib o‘tadi.

Jahon

“Real” yanvar oyida Mbappe bo‘yicha “PSJ”ga yangi taklif yuboradi

“Real” 2022-yilning yanvar oyida Kilian Mbappe borasida “PSJ”ga yangi taklif yuboradi.

Onda Cero’ga ko‘ra, “qirollik klubi” qishda Parij klubiga yangi taklif yuborish borasida ish olib bormoqda.

Eslatib o‘tamiz, madridliklar yozda ham Mbappeni sotib olishga urinib ko‘rgandi, biroq “PSJ” bunga rad javobini bergandi.

Kilianning parijliklar bilan amaldagi shartnomasi 2022-yilning yozida yakuniga yetadi.

Dani Alves “Barselona”ga qaytmoqda

Himoyachi Dani Alves “Barselona”ga qaytadi. Diario Sport nashrining xabar berishicha, Kataloniya klubi 38 yoshli futbolchi bilan shartnoma tafsilotlarini kelishib olgan.

Transferni braziliyalik futbolchi bilan yaxshi tanish bo‘lgan jamoaning yangi bosh murabbiyi Xavi ma’qullagan. Ular uzoq yillar davomida “ko‘k-anorranglilar” safida birga harakat qilgan.

Avvalroq Alvesning “Barselona”ga qaytmoqchiligi va faoliyatini shu jamoada yakunlamoqchi ekanligi haqida xabarlar tarqalgan edi. Biroq keyinchalik jamoada bu transfer muhokama qilinmayotgani aytildi.

APLning oktabr oyidagi eng yaxshilari aniqlandi

Angliya Premyer Ligasining oktabr oyidagi eng yaxshi murabbiyi va futbolchisi aniqlandi.

Unga ko‘ra, “Chelsi” bosh murabbiyi Tomas Tuxel o‘tgan oyning eng yaxshi murabbiyi deb topildi. Londonliklar uning qo‘l ostida oktabr oyida liga doirasidagi to‘rt o‘yinning barchasida g‘alaba qozondi. To‘plar nisbati esa 14:1 ni tashkil qildi.

Mazkur sovrin uchun Tuxeldan tashqari, Yurgen Klopp (“Liverpul”, 2 g‘alaba, 2 durang), Devid Moyes (“Vest Hem”, 3 g‘alaba, 1 mag‘lubiyat) va Patrik Vieyra (“Kristal Pelas”, 1 g‘alaba, 3 durang) da’vogarlik qilgandi.

“Liverpul” hujumchisi Muhammad Saloh esa oyning eng yaxshi futbolchisi bo‘ldi. 29 yoshli misrlik futbolchi chempionat doirasidagi 4 o‘yinda 5 ta gol va 4 ta golli uzatmaga mualliflik qildi.

Shuningdek, Salohdan tashqari quyidagi futbolchilar mazkur sovrin uchun da’vogarlik qilgandi:

• Ben Chiluell (“Chelsi”) — 4 o‘yinda 3 gol;
• Maksvell Korne (“Byornli”) — 3 o‘yinda 3 gol;
• Filip Foden (“Manchester Siti”) 4 o‘yinda 3 gol va 1 golli uzatma;
• Valentino Livramento (“Sauthempton”) — 4 o‘yinda 1 gol;
• Aaron Remsdeyl (“Arsenal”) — 4 o‘yinda 17 ta seyv, 2 ta “quruq” o‘yin;
• Deklan Rays (“Vest Hem”) 4 o‘yinda 1 gol va 1 golli uzatma;
• Yuri Tilemans (“Lester”) — 4 o‘yinda 2 ta gol.

“Chelsi” yarim himoyachisi Hakim Ziyosh faoliyatini Germaniyada davom ettirishi mumkin. 28 yoshli yarim himoyachi qishda London klubini tark etmoqchi, deya xabar beradi Goal.

Futbolchi “ko‘k”lar safida doimiy o‘yin amaliyotiga ega emasligidan norozi. U Premyer Ligada to‘rtta o‘yin o‘tkazgan bo‘lsa, asosiy tarkibda atigi ikki marta maydonga tushdi.

Hozirda unga “Borussiya D” qiziqish bildirmoqda.

Aguero yuragidagi muammo sabab boshqa maydonga tusha olmasligi mumkin

“Barselona” hujumchisi Serxio Aguero yuragidagi muammolar tufayli faoliyatini yakunlashi mumkin.

So‘nggi tekshiruvlardan keyin argentinalikning yuragi bilan bog‘liq muammolar kutilganidan ham jiddiyroq bo‘lishi mumkin, deb yozadi As. Futbolchi boshqa maydonga tusha olmasligi xavfi borligi haqida ogohlantirilgan.

Eslatib o‘tamiz, 30-oktabr kuni 33 yoshli hujumchi “Alaves”ga qarshi o‘yin vaqtida yuragidagi muammolar sabab almashtirilgandi.

Keyinchalik Aguero taxikardiyani boshdan o‘tkazgani va kamida 3 oyni maydon tashqarisida o‘tkazib yuborishi ma’lum qilingandi.

APLning yangi mavsumi qachon boshlanishi ma’lum bo‘ldi

Angliya Premyer Ligasi 2022/23-yilgi mavsum sanalarini e’lon qildi.

Musobaqa 6-avgust sanasida start olib 28-may kuni yakunlanadi. 12—13-noyabr kunlari bo‘lib o‘tadigan 16-tur o‘yinlaridan so‘ng esa Qatarda Jahon chempionati o‘tkazilishi munosabati bilan chempionatda tanaffus boshlanadi. Tanaffus 18-dekabrga qadar davom etadi.