Xalq ta’limi vazirligining Hay’at yig‘ilishida budjet mablag‘larining to‘g‘ri sarflanishini tashkil qilish va kamchiliklarni oldini olish masalalari tanqidiy muhokama qilindi, deb xabar beradi vazirlik matbuot xizmati.
Ma’lum qilinishicha, 10-noyabr kuni Xalq ta’limi vazirligida tizimiga ajratilayotgan budjet mablag‘larining to‘g‘ri sarflanishini tashkil qilish va xatoliklarni oldini olish masalalari to‘g‘risida navbatdan tashqari Hay’at yig‘ilishi bo‘lib o‘tgan.
Mazkur Hay’at yig‘ilishida tizimdagi moliyaviy xatoliklar, xususan Andijon shahar xalq ta’limi bo‘limi tasarrufidagi maktablarda o‘tkazilgan nazorat tadbiri natijalari muhokama qilingan. Ushbu nazorat tadbiri natijalaridan hamda Hisob palatasining ko‘rsatmasidan kelib chiqib, mazkur holatlarni kelgusida takrorlanmaslik va oldini olish bo‘yicha aniq topshiriqlar berilgan. Jumladan:
- kamchiliklarga yo‘l qo‘ygan xodimlarga lavozimidan ozod etishgacha bo‘lgan tegishli intizomiy jazo choralarini qo‘llash;
- xalq ta’limi tizimi bo‘yicha, ayniqsa, Andijon shahar xalq ta’limi bo‘limida mas’ul xodimlarning aloqadorligi yoki harakatsizligi yuzasidan xizmat tekshiruvini o‘tkazish;
- budjet mablag‘larining noqonuniy sarflanishi va talon-toroj qilinishi holatlarining profilaktikasini ta’minlash va ularning oldini olish yo‘nalishi bo‘yicha choralarni kuchaytirish;
- noqonuniy xarajatlarni amalga oshirish xavfi mavjud bo‘lgan hududlar bo‘yicha alohida “qizil” ro‘yxatni shakllantirish hamda ularni doimiy nazorat va kuzatuvga olish yuzasidan amaliy ishlarni yo‘lga qo‘yish bo‘yicha aniq vazifalar belgilab berildi.
Avvalroq Samarqandda 2021-yilda 30 ta holatda maktab o‘quvchilari tomonidan jinoyatlar sodir etilgani, Marg‘ilon shahar xalq ta’limi bo‘limi sobiq boshlig‘i 1,7 mlrd so‘mni talon-toroj qilgani aniqlangani to‘g‘risida xabar berilgandi.