Davlat aktivlarini boshqarish agentligi Toshkentdagi yirik ko‘chmas mulk obyektlaridan birini sotuvga qo‘ydi. Bu haqda “E-auksion.uz” ma’lumotlarida keltirilgan.
Gap Chilonzor tumanidagi “Tirsakobod” mahallasida joylashgan 60-sonli harbiy shaharcha haqida ketmoqda. 1940-yilda qurilgan obyekt Vazirlar Mahkamasining 26-avgustdagi tegishli qaroriga ko‘ra sotuvga chiqarilmoqda.
Ma’lumotlarga ko‘ra, ushbu obyekt 27,86 gektar hududni egallagan, undagi bino va inshootlarning umumiy maydoni 29,8 ming kvadrat metrga teng. Barcha kommunikatsiya — elektr energiyasi, gaz, suv ta’minoti va kanalizatsiya mavjud. Obyekt hududida qorovulxona, bir nechta bostirma, oshxona, ma’muriy bino, omborxona, ustaxona, garaj, rezervuarlar joylashgan.
Sotuvga qo‘yilgan obyektning boshlang‘ich narxi 204,9 milliard so‘mni tashkil etadi. 13-dekabrga qadar davom etadigan savdolarda ishtirok etishni istaganlar 11-dekabrga qadar ariza berishi mumkin.
Avvalroq MIB Bo‘stonliqda auksionga qo‘ygan dala hovli uchun 7,7 milliard so‘m boshlang‘ich narx belgilangani, O‘zbekiston Mudofaa vazirligining foydalanilmayotgan avtomototransportlari sotuvga qo‘yilishi to‘g‘risida xabar berilgandi.
Izoh (0)