Prezident Shavkat Mirziyoyev Qozog‘istonning Qarag‘anda viloyatidagi konda sodir bo‘lgan portlash oqibatida insonlar qurbon bo‘lgani munosabati bilan mamlakat prezidenti Qosim-Jo‘mart To‘qayevga hamdardlik bildirdi. Bu haqda prezident matbuot kotibi Sherzod Asadov ma’lum qildi.
7-noyabr kuni “ArselorMittal Temirtau” kompaniyasiga qarashli “Abay” shaxtasida to‘satdan metan ajralib chiqishi sodir bo‘lgan. Olti ishchi halok bo‘ldi, yana ikki kishi yaralangan. Konda jami 64 nafar ishchi ishlagan bo‘lib, ularning 56 kishi zudlik bilan o‘z-o‘zini evakuatsiya qilgan.
Qosim-Jo‘mart To‘qayev hukumatga konchilar oilalariga yordam ko‘rsatish bo‘yicha topshiriq bergan. Voqea holatlariga oydinlik kiritish uchun hukumat komissiyasi tuzilgan.
Eslatib o‘tamiz, avgust oxirlarida Qozog‘istonning Jambil viloyati Taraz shahri tashqarisida joylashgan harbiy omborda ham portlashlar sodir bo‘lgandi. 27-avgust kuni Shavkat Mirziyoyev Qozog‘iston prezidenti Qosim-Jo‘mart To‘qayev bilan telefon orqali muloqot qilib, fojiali voqea oqibatida insonlar qurbon bo‘lgani munosabati bilan samimiy hamdardlik bildirgandi.
Izoh (0)