Samarqand viloyati Narpay tumanida bir oilaning to‘rt nafar a’zosi is gazidan zaharlanib, vafot etdi. “Daryo” so‘roviga javoban mazkur xabarni tasdiqlagan Bosh prokuratura axborot xizmati voqea 2021-yilning 22-oktabr kuni sodir bo‘lganini bildirdi.
Ma’lum qilinishicha, 22-oktabr kuni soat 12:30 larda tumanning “Narpay” mahallasida yashovchi fuqaro J.S. (1984-yilda tug‘ilgan), uning turmush o‘rtog‘i Sh.Z. (1987-yilda tug‘ilgan) hamda 2 nafar voyaga yetmagan farzandlari — M.X. (2012-yilda tug‘ilgan) hamda J.X.ning (2018-yilda tug‘ilgan) murdasi yashash uyida is gazidan zaharlangan holda tan jarohatlarisiz topilgan.
Hodisa joyini ko‘zdan kechirishda marhumlar yotgan xonada qo‘lbola usulda yasalgan, tabiiy gaz tarmog‘iga ulangan isitish pechi mavjud bo‘lib, mazkur pechning dud-bo‘ronida qushlar in qurgani natijasida xas-xashaklar bilan to‘lib qolgani aniqlangan.
Holat yuzasidan 22-oktabr kuni tuman prokuraturasi tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a, b” bandlari bilan jinoyat ishi qo‘zg‘atilgan.
Eslatib otamiz, 27-oktabr kuni Past Darg‘om tumani hokimligida o‘tkazilgan brifingda FVB vakili Samarqand viloyatida 10 kun ichida is gazidan zaharlanish bilan bog‘liq 4 ta holat qayd etilgani, oqibatida sakkiz kishi vafot etganini ma’lum qilgandi.
Izoh (0)