Qoraqalpog‘istonning sobiq prokurori 44 yoshida vafot etdi
Qoraqalpog‘iston Respublikasi prokuraturasi agrar va oziq-ovqat sohalarini rivojlantirishga oid qonunchilik ijrosi ustidan nazorat bo‘limi prokurori Ikromjon Polvonov vafot etdi.
Bosh prokuratura matbuot xizmatining “Daryo” so‘roviga asosan aniqlik kiritishicha, u og‘ir xastalik oqibatida 44 yoshida vafot etdi.
Ikromjon Polvonov 1977-yilda To‘rtko‘l tumanida tug‘ilgan. 1999-yilda Toshkent davlat yuridik institutini tugatgan. U o‘z mehnat faoliyatini To‘rtko‘l tuman prokuraturasida boshlagan, Nukus prokurori yordamchisi va Nukus prokuraturasi katta tergovchisi bo‘lib ishlagan. 2004-yilda Qoraqalpog‘iston prokurori yordamchisi etib tayinlangan, so‘ng O‘zbekiston Bosh prokuraturasi boshqarmasi prokurori lavozimini egallagan.
2008-yilda esa Xorazm viloyati Xonqa tumani prokurori etib tayinlangan, so‘ng Buxoro viloyati prokurori o‘rinbosari, Qoraqalpog‘iston prokurori o‘rinbosari va birinchi o‘rinbosari lavozimlarida ishlagan.
Ikromjon Polvonov 2014-yili Qoraqalpog‘iston Respublikasi prorkurori etib tayinlangan edi, vafotiga qadar Qoraqalpog‘iston prokuraturasida bo‘lim prokurori lavozimida ishlab kelgan.
Eslatib o‘tamiz, 2020-yilning avgustida O‘zbekiston Bosh prokuraturasining 37 yoshli xodimi, 2021-yil aprelda esa Bosh prokuraturasining 33 yoshli xodimi vafot etgani to‘g‘risida xabar berilgandi.
