Dunyo va o‘zbek sportiga oid 8-noyabr kunining eng muhim xabarlari dayjesti bilan tanishing.
O‘zbekiston
Shavkat Mirziyoyev Parij—2024 Olimpiya va Paralimpiya o‘yinlariga kompleks tayyorgarlik ko‘rish bo‘yicha qarorni imzoladi
O‘zbekiston Respublikasi Prezidenti Shavkat Mirziyoyev 2024-yil Parij shahrida bo‘lib o‘tadigan Olimpiya va Paralimpiya o‘yinlariga sportchilarimizni puxta tayyorlash bo‘yicha “2024-yil Parij shahrida (Fransiya) bo‘lib o‘tadigan XXXIII yozgi Olimpiya va XVII Paralimpiya o‘yinlariga O‘zbekiston sportchilarini kompleks tayyorlash to‘g‘risida”gi Qarorni imzoladi. Qarorning to‘liq matni bilan bu yerda tanishishingiz mumkin.
Isroil Madrimov navbatdagi jangini Toshkentda o‘tkazadi
Professional boksning super yarim o‘rta vazn toifasi (-69,8 kg) harakat qiladigan Isroil Madrimov (7-0, 5 KO) o‘zining navbatdagi jangini Toshkentda o‘tkazadi.
17-dekabr kuni Humo Arena o‘yingohida o‘tkaziladigan jangda fransiyalik Mishel Soroga (35-2-1, 24 KO) qarshi ringga ko‘tariladi. Madrimov—Soro jang g‘olibi WBA Super kamari uchun majburiy da’vogarga aylanadi. WBA Super kamari ayni damda Jermell Charloga (34-1-1, 18 KO) tegishli hisoblanadi.
Shuningdek, mazkur boks oqshomida Isroil Madrimovdan tashqari, o‘zbekistonlik bokschilardan Bahodir Jalolov, Shahram G‘iyosov va Hasanboy Do‘stmatov ham o‘zining navbatdagi janglarini o‘tkazishi kutilmoqda.
Avvalroq Srechko Katanes 28 futbolchidan iborat kengaytirilgan tarkibni e’lon qilgandi. Yakuniy qaydnomada esa bir qator o‘zgarishlar yuz bergan. Kengaytirilgan tarkibga kiritilgan darvozabon Sanjar Quvvatov (“Paxtakor”), himoyachi Jaloliddin Jumaboyev (“Lokomotiv”), yarim himoyachilar Sanjar Qodirqulov, Javohir Sidiqov (ikkisi – “Lokomotiv”), hujumchi Azizbek Omonov (Lokomotiv) yakuniy qaydnomadan joy olmagan.
Terma jamoadan chaqiruv olgan himoyachi Rustam Ashurmatov viza bilan bog‘liq muammolar sabab bu galgi yig‘inda ishtirok etolmaydigan bo‘ldi. Uning o‘rniga “Paxtakor” klubi a’zosi Marlen Chobanov jalb etilgan.
Shuningdek, Belarusning “BATE” jamoasi hujumchisi Shahboz Umarov koronavirusga chalingani sabab o‘quv-mashg‘ulotlar yig‘inini o‘tkazib yuboradi. Uning o‘rniga qaysi futbolchi terma jamoaga jalb etilishi borasida hozircha ma’lumot berilmagan.
Jahon
“Barselona” rasman Xavini bosh murabbiy sifatida tanishtirdi“Barselona” Xavini rasman jamoa bosh murabbiyi sifatida tanishtirdi.
41 yoshli mutaxassis “Kamp Nou” stadionida Kataloniya klubi prezidenti Xoan Laporta hamrohligida muxlislar oldiga chiqish qildi. Shundan so‘ng Xavi va Lapota o‘rtasida rasmiy shartnoma imzolangan.
Avvalroq Xavining “ko‘k-anorranglilar” bilan 2024-yilgacha mo‘ljallangan shartnomaga kelishib olgani haqida xabar berilgandi.
“Manchester Yunayted” Sulsherga ishonishda davom etadi
“Manchester Yunayted” bosh murabbiyi Ole-Gunnar Sulsher APLning 11-turida “Manchester Siti”dan uchralgan mag‘lubiyatdan so‘ng (0:2) ham iste’foga chiqarilmaydi.
The Guardian xabariga ko‘ra, norvegiyalik murabbiy Premyer Liganing 12-turidan o‘rin olgan “Uotford”ga qarshi o‘yinda (20-noyabr) ham jamoani boshqaradi.
Qayd etilishicha, klub rahbariyati jamoaning so‘nggi paytlardagi qoniqarsiz natijalariga qaramay, Sulsherga ishonishda davom etadi va u FIFA kunlaridan keyin ham jamoaga ustozlik qiladi.
“Milan” Pioli bilan shartnomani uzaytirmoqchi
“Milan” jamoa bosh murabbiyi Stefano Pioli bilan 2024-yilgacha mo‘ljallangan yangi shartnoma imzolashga yaqin turibdi, deb yozmoqda taniqli insayder Nikolo Skira.
Qayd etilishicha, 56 yoshli italiyalikning maoshi yangi shartnomaga ko‘ra bir mavsum uchun 2 million yevrodan 3 million yevroga oshadi.
Piolining milanliklar bilan amaldagi kelishuvi 2022-yilning iyunida o‘z nihoyasiga yetadi.
“Real” yozda 6 nafar futbolchisi bilan xayrlashmoqchi
“Real” 2021/22-yilgi mavsum oxirida birdaniga olti nafar futbolchi bilan xayrlashishi mumkin, ularning jamoada qolishi iqtisodiy jihatdan klubga ortiqcha yuk bo‘lishi mumkin.
AS xabariga ko‘ra, gap himoyachilar Marselo, Xesus Valyexo, yarim himoyachi Isko, hujumchilar Garet Beyl va Luka Yovich, shuningdek, Eden Azar haqida ketmoqda.
Agar bu futbolchilar jamoani tark etsa, “Real” maoshlardan yiliga 54 million yevrogacha tejab qoladi. Bu o‘z navbatida “PSJ” hujumchisi Kilian Mbappe bilan shartnoma imzolash va Vinisius Juniorga yaxshilangan bitim taklif qilish imkonini beradi.
Ma’lumot uchun, Azar va Beyl yiliga 15 million yevrodan maosh oladi. Isko va Marselo 8, Yovich 5 million yevro olsa, Valyexoda bu ko‘rsatkich 3 million yevroni tashkil qiladi.
“Nyukasl”ga yangi murabbiy tayinlandi
Eddi Hou “Nyukasl” bosh murabbiyi etib tayinlandi. Bu haqda klub matbuot xizmati xabar berdi.
43 yoshli angliyalik mutaxassis klub bilan 2024-yilning iyunigacha mo‘ljallangan bitim borasida kelishib olgan. Hau bungacha “Byornli” va “Bornmut” klublarida faoliyat yuritgan, u 2021-yilning yozidan beri ishsiz edi.
“Nyukasl” Angliya chempionatining 11-turidan keyin 5 ochko bilan musobaqa jadvalida 19-o‘rinda bormoqda.
Avvalroq klub Saudiya fondi tomonidan sotib olinganidan keyin katta transferlarni amalga oshirishi haqida xabarlar tarqalgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)