“Tibbiyot sohasiga yo‘naltiriladigan mablag‘lar ikki baravarga oshiriladi, oliy toifali shifokorlar maoshi ming dollarga yetkaziladi” — Shavkat Mirziyoyev

Oliy Majlis Senatining yangi binosida Prezidentlikka saylangan Shavkat Mirziyoyevning inauguratsiya marosimi bo‘lib o‘tdi. Prezident sifatida qasamyod qabul qilgan Shavkat Mirziyoyev tibbiyot sohasida ko‘zlangan islohotlar haqida gapirdi.

“Taraqqiyot strategiyamizda xalqimiz salomatligini ta’minlash bundan buyon ham bosh vazifa bo‘lib qoladi.

Ushbu sohaga yo‘naltiriladigan mablag‘larni 2 barobar oshirish, jumladan, kelgusi besh yilda oliy toifali shifokorlar maoshini ekvivalent hisobida ming dollarga yetkazish mo‘ljallanmoqda.

Asosiy maqsad – tibbiyot sohasini chinakamiga xalq dardiga darmon bo‘ladigan, yuqori samara bilan ishlaydigan tizimga aylantirishdan iborat”, — dedi Shavkat Mirziyoyev.

Bundan tashqari, tibbiyotning birlamchi bo‘g‘ini orqali tibbiy profilaktikaga, oilaviy shifokorlar rolini oshirishga alohida e’tibor qaratilishi ta’kidlandi.

Jumladan, aholi orasida eng ko‘p tarqalgan va erta o‘limning asosiy sababi bo‘lgan kasalliklarni barvaqt aniqlash, maqsadli skrining tadbirlarini amalga oshirish, profilaktik maxsus preparatlar bilan bepul ta’minlash hamda sog‘lom turmush tarzini keng targ‘ib etish choralari ko‘riladi.

Bundan avval Shavkat Mirziyoyev 2025-yilga borib o‘qituvchilarning maoshi 1000 dollarga yetkazilishini, O‘zbekistonda oldingi besh yilga nisbatan 10 barobar ko‘p uy-joy qurilganini hamda O‘zbekistonda kuzatilayotgan chang bo‘ronlari haqida fikr bildirgani haqida xabar berilgandi.