Samarqand viloyati Pastdarg‘om tumanida joylashgan “Samarqand gaz to‘ldirish stansiyasi”dan surunkali ravishda “Nurobod gaz servis” MChJga qarashli DAF rusumli 20 tonna sig‘imli yuk avtomashinasida aholi xonadonlariga ajratilgan imtiyozli narxdagi suyultirilgan uglevodorodli gazni yashirin ravishda talon-toroj qilib kelgan jinoiy uyushma faoliyati fosh etildi. Bu haqida Samarqand viloyat prokuraturasi “Daryo”ga ma’lum qildi.
Ta’kidlanishicha, holat bo‘yicha Jinoyat kodeksining 169-moddasi 4-qismi “v” bandi (uyushgan guruh tomonidan yoki uning manfaatlarini ko‘zlab sodir etilgan o‘g‘rilik) bilan jinoyat ishi qo‘zg‘atilgan.
Tergovining birinchi kunida 6 nafar jinoiy uyushma a’zolariga nisbatan qamoq ehtiyot chorasi qo‘llanilgan.
Prokuratura jinoiy guruh a’zolari kengayishi mumkinligini bildirgan.
E’tiborli jihati, tezkor ma’lumotlarga ko‘ra, mazkur jinoiy uyushmaga bir qator mansabdor shaxslar va huquqni muhofaza qiluvchi organ xodimlari rahnamolik qilib kelgan.
Jinoyat ishi tergovi shaxsan Samarqand viloyati 2-sektor rahbari – viloyat prokurori Ravshan Masharipovning nazoratiga olingan. Viloyat 2-sektor rahbari 10 nafar jinoyatni fosh etishga yaqindan ko‘mak berganlarga tashakkurnoma e’lon qilib, esdalik sovg‘alari ulashdi.
Jinoyat tafsilotlari yoritib boriladi deyiladi viloyat prokuraturasi bayonotida.
Izoh (0)