Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanali O‘zbekiston va Qozog‘istonning 5-noyabr kunining birinchi yarmida sun’iy yo‘ldoshdan olingan tasviri bilan bo‘lishdi.
Unda chang-g‘ubor hodisasi bilan bog‘liq xiralik Qozog‘istonning janubiy viloyatlari, Toshkent, Sirdaryo, qisman Jizzax hamda Farg‘ona vodiy viloyatlari atmosferasini bulut misol qoplab olganini ko‘rish mumkin. Shuningdek, tasvirda Surxondaryo viloyati osmonida ham biroz xiralik mavjudligi ko‘ringan.
Kanal muallifining yozishicha, 6-noyabr kuni ham ayrim hududlarda ko‘rinuvchanlikni xiralashtiruvchi chang-g‘ubor saqlanadi. Respublika viloyat markaziy shaharlarida havo harorati 9 daraja sovuq 0 daraja iliq oraliqni tashkil etmoqda. Nukus shahrida havo harorati 8,8 daraja sovuq, Namangan shahrida 0,5 daraja iliq. Markaziy shaharlarda yog‘ingarchilik yo‘q. Toshkent va Nurafshonda tuman kuzatilmoqda.
Ma’lumotlarga ko‘ra, 6-noyabr kuni respublikada havo kam bulutli, yog‘ingarchilik kutilmaydi. Hududlarga tuman tushadi.
Harorat kunduz kuni shimolda, 1—6 daraja iliq, boshqa hududlarda 5—10 daraja iliq, kechqurun shimolda 3—8 daraja sovuq, boshqa joylarda 1 daraja iliq 4 daraja sovuqni tashkil etadi.
“Kuchli shamollar kutilmaydi. Toshkent, Sirdaryo va Farg‘ona vodiy viloyati ayrim hududlarida chang-g‘ubor hodisasi saqlanadi”, — deyiladi xabarda.
Eslatib o‘tamiz, Sirdaryoda 4-noyabr kuni boshlangan chang bo‘roni kechga borib Toshkentga ham yetib keldi. Chang tufayli atrofni ko‘rish darajasi cheklandi. Avtomobillar harakati sekinlashdi. Keyinroq “O‘zgidromet”ning buning oqibatida havodagi chang miqdori belgilangan me’yordan 5 barobarga oshganini bildirdi. Nafas olishda muammolar yuzaga kelgan poytaxt aholisi tibbiyot muassasalariga murojaat qilishni boshladi, 5-noyabr kuni esa Sog‘liqni saqlash vazirligi fuqarolarga chang bo‘ronida nimalar qilish bo‘yicha tavsiyalar berdi.
Izoh (0)