O‘zbekistonda so‘nggi kunlarda sodir bo‘lgan YTHlar oqibatida 4 kishi vafot etdi. Ularning 2 nafari voyaga yetmagan

O‘zbekiston Ichki ishlar vazirligi va hududiy boshqarmalar xabar bergan so‘nggi kunlardagi yo‘l-transport hodisalari tafsilotlarini taqdim etamiz.

Damas 16 yoshli qizning o‘limiga sababchi bo‘ldi

Shu yil 3-noyabr kuni soat 07:10 larda, Farg‘ona halqa yo‘lining 93 kilometrida, Namangan tumani “Qurama” MFY hududida, Damas rusumli avtomashinani boshqarib ketayotgan haydovchi harakat xavfsizligini ta’minlay olmay, yo‘lni kesib o‘tayotgan 2005-yilda tug‘ilgan qizni urib yuborgan. Oqibatda piyoda olgan tan jarohati oqibatida shifoxonada vafot etgan.

Ushbu holat bo‘yicha tuman IIB huzuridagi TB tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.

Qashqadaryoda teplovoz va Lacetti to‘qnashib ketdi

Qayd etilishicha, 2021-yilning 4-noyabr kuni soat 20:00 larda Qashqadaryo viloyati, Koson tumani, Mudin qishlog‘i hududidan o‘tuvchi A-380 avtomobil yo‘lining 149-kilometrida haydovchi, 1992-yilda tug‘ilgan S.T. Lacetti avtomobilini boshqarayotib, temiryo‘l kesishmasiga chiqib ketishi oqibatida Buxoro–Qarshi yo‘nalishi bo‘ylab harakatlanib kelayotgan yuk tashuvchi teplovoz bilan to‘qnashgan.

Hodisa oqibatida Lacetti avtomobili haydovchisi olgan og‘ir tan jarohatlari tufayli shifoxonada vafot etgan.

Mazkur YTH yuzasidan Koson tumani IIB huzuridagi TB tomonidan dastlabki tergov harakatlari olib borilmoqda.

Surxondaryoda Hyundai 2004-yilda tug‘ilgan o‘quvchini urib yubordi

2021-yil 4-noyabr kuni Surxondaryo viloyati Qumqo‘rg‘on tumani “Hurriyat” mahallasi hududidan o‘tuvchi xalqaro ahamiyatga ega M-41 avtomobil yo‘lining 1534-kilometrida 2001-yil tug‘ilgan haydovchi Hyundai Porto yuk mashinasida piyodalar yo‘lagidan o‘tayotgan 2004-yilda tug‘ilgan o‘quvchini urib yuborgan.

Jabrlanuvchi ko‘rsatilgan tibbiy yordamga qaramay vafot etgan.

Denovda o‘g‘il otasining o‘limiga sababchi bo‘ldi

Surxondaryo viloyati Denov tumanida haydovchilik guvohnomasini olganiga endi 9 oy bo‘lgan 26 yoshli yigit Nexia avtomobilida otasi, onasi, xolasi va uning voyaga yetmagan farzandlari bilan tunda tezlikni oshirib harakatlangan.

U o‘z yo‘nalishida harakatlanib ketayotgan, haydovchilik huquqiga ega bo‘lmagan fuqaro boshqaruvidagi T-28 rusumli traktorning tirkamasiga kelib urilgan.

Oqibatda Nexia haydovchisining yonida o‘tirib kelayotgan otasi voqea joyida halok bo‘lgan. Bundan tashqari Nexia’ning orqa o‘rindig‘idagi ikki yo‘lovchi olgan tan jarohatlari sabab shifoxonaga yotqizilgan.

Chiroqchida Nexia’ning gaz balloni portlab ketdi

Qayd etilishicha, 2021-yilning 4-noyabr kuni soat 19:55 larda Qashqadaryo viloyati, Chiroqchi tumanida joylashgan “Annaro‘z” jome masjidi binosining ro‘parasida haydovchi, 1992-yilda tug‘ilgan S.X. boshqaruvidagi Nexia avtomobiliga o‘rnatilgan gaz ballonida portlash sodir bo‘lgan (harakat davomida).

Hodisa natijasida tan jarohati olgan fuqarolar yo‘q. Transport vositasiga zarar yetgan.

Mazkur hodisa yuzasidan Chiroqchi tumani IIB huzuridagi TB va FVB tomonidan dastlabki surishtiruv harakatlari olib borilib, hodisa sodir bo‘lish sabablariga aniqlik kiritilmoqda.