Hukumat qarori bilan bosh vazir maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i Olimjon Umarov lavozimidan ozod qilindi. Bu haqda hukumatning tegishli qaroriga tayanib, Telegram’dagi “Davletovuz” kanali xabar berdi.
Olimjon Umarov 1985-yilda Toshkent shahrida tug‘ilgan. Oliy ma’lumotli. 2007-yilda Mirzo Ulug‘bek nomidagi O‘zbekiston Milliy universitetini, 2017-yilda Songyungvan universitetini (Janubiy Koreya) tamomlagan. U 2017—2020-yillarda AKT vazirining birinchi o‘rinbosari lavozimida ishlagan, 2020-yil mayida O‘zbekiston bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshlig‘i lavozimiga tayinlangandi.
Avvalroq O‘zbekiston Prezidentining farmoniga asosan, Axborot texnologiyalari va kommunikatsiyalarini rivojlantirish vaziri Shuhrat Sodiqov o‘z lavozimidan ozod qilingani to‘g‘risida xabar berilgandi.
Eslatib o‘tamiz, 3-noyabr kuni Axborotlashtirish va telekommunikatsiyalar sohasida nazorat bo‘yicha davlat inspeksiyasi (“O‘zkomnazorat”) Telegram, YouTube, Instagram, Facebook, “Odnoklassniki”ning O‘zbekistondagi faoliyatini cheklagandi.
Shundan so‘ng, Prezident matbuot kotibi Sherzod Asadov “O‘zkomnazorat”ning bir yoqlama, uzoqni o‘ylamay qilgan harakatidan davlat rahbari xabar topganini ma’lum qildi. Axborotlashtirish va telekommunikatsiyalar sohasida nazorat bo‘yicha davlat inspeksiyasi boshlig‘i G‘olibsher Ziyayev esa noto‘g‘ri va kelishilmagan xatti-harakatlari uchun egallab turgan vazifasidan chetlatildi. O‘zbekistonda ijtimoiy tarmoqlar faoliyatiga cheklov qo‘yilgani holati yuzasidan tergov o‘tkazilishi ma’lum qilindi.
Izoh (0)