Mashina ichida yonib ketgan haydovchi, eshak arava bilan to‘qnashgan Nexia. O‘zbekiston yo‘llarida sodir bo‘lgan YTH tafsilotlari

So‘nggi kunlarda O‘zbekiston yo‘llarida sodir bo‘lgan yo‘l-transport hodisalari va qoidabuzarliklar tafsilotini taqdim etamiz.

Jizzaxda haydovchi Nexia ichida yonib ketib vafot etdi

Qayd etilishicha, 2021-yilning 2-noyabr kuni soat 04:20 larda Qashqadaryo viloyati, Kitob tumani, “Qaynar” MFY hududidan o‘tuvchi M–39 avtomobil yo‘lining 1143-kilometrida haydovchi, 1990-yilda tug‘ilgan J.J. Nexia avtomobilni boshqarayotib, ehtiyotsizligi oqibatida rul boshqaruvini yo‘qotgan va yo‘l chetidagi katta toshga urilib, ag‘darilib ketgan. YTH tufayli avtomobilda yong‘in yuzaga kelgan.

Haydovchi YTH hamda yong‘in oqibatida hodisa joyida vafot etgan.

Mazkur holat yuzasidan Kitob tumani IIB huzuridagi TB tomonidan tergov harakatlari olib borilmoqda.

Nexia-2 eshak aravada ketayotgan fuqaroning hayotiga zomin bo‘ldi

2021-yil 30-oktabr kuni soat 20:30 larda, Pop tumani “Pilol” MFY hududida, Nexia-2 avtomashinasini boshqarib ketayotgan haydovchi harakat xavfsizligini ta’minlay olmay, yo‘l chetida eshak aravada ketayotgan, 1965-yilda tug‘ilgan fuqaroni urib yuborgan.

Oqibatda jabrlanuvchi olgan tan jarohati oqibatida shifoxonada vafot etgan.

Ushbu holat bo‘yicha tuman IIB huzuridagi TB tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.

Nukusda mast haydovchi boshqarib kelayotgan Cobalt boshqa bir Cobalt bilan to‘qnashdi

Nukus shahrida Cobalt haydovchisi mast holda transport boshqarib, o‘zi bilan bir yo‘nalishda ketayotgan boshqa bir Cobalt’ga borib urilgan.

YTH oqibatida hech kim tan jarohati olmagan, avtomobillarga zarar yetgan.

"]

Mast haydovchi ichki ishlar bo‘limiga olib ketilgan, avtomashina esa jarima maydonchasiga qo‘yilgan.

TikTok uchun odamlarni yukxonasiga chiqarib harakatlangan Labo

IIV YHXBB xabariga ko‘ra, Labo’ning yukxonasiga yigitlarni chiqarib, salondagi yo‘lovchini mashina oynasidan tanasini chiqarishiga yo‘l qo‘ygan haydovchiga nisbatan belgilangan tartibda ma’muriy bayonnoma rasmiylashtirildi.

“Yo‘lovchi tashish mumkin bo‘lmagan joyga odam mindirib, qilgan ishimdan pushaymonman. Yo‘lovchilarning hayotini xavf ostiga qo‘yib harakatlandim”, – deydi haydovchi.