Qashqadaryo viloyati hokimi Zoir Mirzayev viloyat rahbari sifatidagi ikki yillik faoliyatidan so‘ng hukumat tarkibida ko‘rinish berishi mumkin. Bu haqda Zoir Mirzayevning “Daryo” muxbiri bilan suhbatida so‘z bordi.
“Daryo” Qashqadaryo hokimi Zoir Mirzayevning viloyatda faoliyat ko‘rsatayotganiga ikki yil to‘lishi munosabati bilan hokimni suhbatga chorladi.
Zoir Mirzayev suhbat davomida “Daryo” muxbirining “Ijtimoiy tarmoqlar, xususan, Facebook kuzatuvchilari orasida sizning ikki yillik faoliyatingizni yuqori baholagan va ertaga hukumat tarkibida ko‘rinish berib, viloyat rahbari sifatidagi lavozimingizni tark etishingiz mumkinligini yozishgan. Xo‘sh, kuzatuvchilarning fikri qanchalik asosli? Haqiqatan ham Zoir Mirzayevni hukumat tarkibida ko‘ramizmi?”, degan savoliga javob berdi.
“O‘sha fikrlarni o‘zim ham o‘qidim. Boisi Facebook’ni doimo kuzatib boraman, Qashqadaryo haqidagi har bir fikrga e’tibor qarataman. Muammolarni yozishsa, bu haqda o‘rinbosarlarimga topshiriq berib, yechimi bilan shug‘ullanaman. Aynan o‘sha fikrlar bilan birga viloyatdagi barcha o‘zgarishlarni bir o‘zi qilmagandir, hali ulkan muvaffaqiyatlar demay turaylik, degan fikrlarga ham ko‘zim tushdi. Turli fikrlar bor, albatta. Ammo men bir narsani xohlaymanki, ertaga qaysi lavozimda ishlashingizdan qat’i nazar, ketganingizdan keyin o‘sha eski ishlagan joyingizdan kimdir yo‘qlasa, ishingizni tan olib gapirsa yoki telefon qilib bayramlarda tabriklab qo‘ysa, xursand bo‘lingki, siz odamlar ko‘nglidan joy olibsiz. Odamlarning emas, bir odamning bo‘lsa-da, ko‘nglidan joy olgan bo‘lsangiz bu quvonarli”, — deydi Zoir Mirzayev.
Qashqadaryo hokimi, shuningdek, qashqadaryoliklarga ishi qanchalik ma’qul kelayotgani haqida ham fikr bildirgan.
“Qashqadaryo juda katta el. Viloyat xalqining ko‘nglidan chuqur joy olishimizga hali ancha vaqt bor. Ammo harakatdan to‘xtamay, buni eplashga urinyapmiz. Biz hokimlar Prezidentimiz topshirig‘ini bajarish barobarida viloyatdagilar bilan yaxshilab tanishyapmiz. Ulardan birini aka, yana birini esa uka sifatida tanib, ularning og‘irini yengil qilishga harakat qilyapmiz”, — degan viloyat rahbari.
Zoir Mirzayev suhbat davomida Qashqadaryo viloyatida rahbarlik qilishda davom etishini istashini, borini boricha qabul qiladigan, borini yuzga aytadigan qashqadaryoliklar bilan ishlashda davom etishga xohishi borligini bildirgan.
“O‘zim ham bag‘rikeng, borini boricha qabul qiladigan, borini yuzga aytadigan, ko‘nglidan chiqsangiz hatto jonini ham berishga tayyor qashqadaryoliklar bilan ishlashda davom etishni xohlardim. Qani endi imkoni bo‘lsa-yu, qashqadaryoliklar bilan uzoq vaqt ishlasam. Lekin baribir rahbar sifatida har qanday vazifaga tayyor turganman. Va takror bo‘lsa-da aytamanki, rahbar sifatida to‘rt-besh kishining yuragida qolsam yoki qilgan ishim uning xotirasida qolsa, menga shu kifoya”, — degan viloyat hokimi.
Zoir Mirzayevning qo‘shimcha qilishicha, uning ayni paytdagi lavozimi rahbar sifatidagi to‘qqizinchi mansabi hisoblanadi.
Izoh (0)