So‘xdagi yangi aerodromda ilk sinov parvozi amalga oshirildi (foto)
Oktabr o‘rtalarida Farg‘ona viloyatining So‘x tumanida aerodrom qurilishi yakunlangani, yaqin kunlarda sinov uchishlari amalga oshirilishi to‘g‘risida xabar berilgandi. “Daryo” muxbirining So‘x tumani hokimligi axborot xizmati rahbari Anvar Jo‘rayevga tayanib, ma’lum qilishicha, 1-noyabr kuni sinov parvozi Humo Air aviakompaniyasiga qarashli An-2P yo‘lovchi tashish samolyotida amalga oshirilgan.
Ma’lum qilinishicha, mahalliy vaqt bilan soat 12:30 da Farg‘ona xalqaro aeroportidan havoga ko‘tarilgan An-2P samolyoti soat 13:10 da So‘xdagi aerodromga kelib qo‘ngan. Ilk parvoz aholi va keng jamoatchilik vakillari tomonidan katta tantana bilan kutib olingan. Shu kunning o‘zida samolyot So‘xdan Farg‘onaga parvoz qilgan va soat 14:07 da Farg‘ona xalqaro aeroportiga yetib kelgan.
Eslatib o‘tamiz, O‘zbekiston Prezidentining “2020–2021-yillarda Farg‘ona viloyatining So‘x tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi qarorida So‘x tumanida samolyot va vertolyotlar uchun uchish-qo‘nish maydonchalari tashkil etilishi belgilangan edi. Parvozlar uchun An samolyotlari va Mi-8 vertolyotlaridan foydalanish rejalashtirilgandi.
Ma’lumot uchun, tumanga kichik aviatsiya transporti qatnovini yo‘lga qo‘yish maqsadida “Navobod” mahalla fuqarolar yig‘ini hududida samolyot va vertolyotlar uchun uchish-qo‘nish maydonchasi tashkil etilgan. Uchish-qo‘nish maydonchasining uzunligi 650 metr va eni 100 metr bo‘lgan mazkur aerodrom qurilishi uchun qariyb 7 gektar yer maydoni ajratilgan.
Qurilish ishlari uchun 6 milliard 800 million so‘m mablag‘ ajratilib, kutish zali, ovqatlanish shoxobchasi, savdo nuqtasi, dam olish joylarini o‘zida qamrab olgan zamonaviy majmua bunyod etilgan.
