Ijtimoiy tarmoqlarda Onalik va bolalikni muhofaza qilish boshqarmasi boshlig‘i Marat Sodiqovning sog‘liqni saqlash vaziri Abduhakim Xojiboyevga yozgan xati tarqaldi, deb xabar beradi “Gazeta.uz”.
Unda boshqarma boshlig‘i 17-may kuni Toshkent viloyatidagi ko‘p tarmoqli poliklinikada tug‘uruqning ertasi kuni 1998-yilda tug‘ilgan ayol vafot etganini ma’lum qilgan. Tashxis sifatida o‘tkir yurak-tomir yetishmovchiligi, o‘tkir buyrak-jigar yetishmovchiligi, DVS sindrom gipokoagulyatsiya bosqichi, oshqozon-ichakdan qon ketishi ko‘rsatilgan.
Shuningdek, ta’kidlanishicha, murda ekspertiza tekshiruviga yuborilgan.
Bundan tashqari, xatga vazir o‘rinbosari Elmira Bositxonova ham imzo chekkan. Unda “vazirga kiritilmasin” yozuvini, shuningdek, bosh akusher-ginekolog ikki nafar professor orqali xulosa berishi kerakligi yozilgan. Oxiriga “sababsiz o‘lim” deya yozilgan.
Sog‘liqni saqlash vaziri o‘rinbosari Toshkent viloyatidagi poliklinikada rostdan ham shu kabi holat sodir bo‘lganini tasdiqlagan. U xatga javobi “noto‘g‘ri talqin qilinganini” ma’lum qilgan.
“Boshqarma boshlig‘i tomonidan berilgan ma’lumotni sog‘liqni saqlash vaziriga chuqur o‘rganib, sabablar va tahlillar asosida kiritish lozim. Masala onalar va bolalar o‘limi haqida ketar ekan, yuzaki xulosalarga tayanmasdan chuqur o‘rganish kerak. Bu o‘rganish ishlarini bosh akusher-ginekolog bilan birga ikki professor olib borishi kerakligi haqida topshiriq berilgan. O‘lim sabablari chuqur o‘rganilib, keyin vazirga hisobot berish kerakligi nazarda tutilgan”, — deya uning so‘zlarini keltiradi “Kun.uz”.
“Go‘daklar va onalar o‘limi bilan bog‘liq har bir holat bekitiladigan narsa emas. Qonunda ham, tibbiyotda ham har bir o‘lim holati sabablari tahlil qilinib, chora ko‘riladi va bu keyin yuzaga kelishi mumkin bo‘lgan muammolarga yechim bo‘lib xizmat qiladi. Shuning uchun ham bu holni bekitish yoki ‘yopdi-yopdi’ qilishdan biror inson manfaatdor emas”, — deydi Bositxonova.
Vazir o‘rinbosari xatda “kritik” so‘zi yozilganini alohida qayd etgan.
“Bu yozuvni qayd etishdan maqsad nimanidir xaspo‘shlash yoki bekitish emas. Bunday noto‘g‘ri xulosalar qilish bu vaziyatni noto‘g‘ri talqin qilish deb o‘ylayman”, — deydi Bositxonova.
Uning so‘zlariga ko‘ra, o‘lim sabablari chuqur o‘rganilgan, xulosalar olingan va aybdor shaxslar o‘z jazosini olgan. “Inson hayoti bilan bog‘liq bunday holatlar qayta sodir bo‘lishining oldini olish maqsadida bu tibbiy tahlil butun respublikadagi tug‘ruq komplekslariga ko‘rsatma xati bilan birgalikda yetkazilgan”, — deydi sog‘liqni saqlash vaziri o‘rinbosari.
Izoh (0)